વિદેશમાં જેમ-જેમ ભારતીયોની સંખ્યા વધી રહી છે તેમ તેમ ત્યાં ગુનાહિત પ્રવૃત્તિઓમાં પણ તેમની સંડોવણી વધતી જાય છે. હાલમાં કેનેડામાં આવી જ એક ક્રિમિનલ એક્ટિવિટીમાં ભારતીય મૂળના વ્યક્તિનું નામ સામે આવ્યું છે. વેસ્ટર્ન મોન્ટ્રીયલની સ્ટ્રીટ પર 31 રૂમના ગેસ્ટ હાઉસ મોટેલ સેન્ટ-જેક્સનો માલિક કથિત રીતે ડ્રગ ટ્રેડ અને પ્રોસ્ટિટ્યુશનમાંથી કમાણી કરતો હતો. પોલીસના જણાવ્યા અનુસાર આ મોટેલનો માલિક ત્યાં ચાર કલાકના રોકાણ માટે 45 ડોલર અને 40 ડોલર કથિત રીતે ક્રેક કોકેઈનની બેગ ખરીદવા માટે વસૂલત હતો. ગત સપ્તાહે ક્યુબેક કોર્ટમાં દાખલ કરવામાં આવેલી પોલીસ એફિડેવિટ મુજબ જેક તરીકે ઓળખાતા મોટેલના માલિક જીતેન્દ્રકુમાર પટેલે અન્ડરકવર પોલીસ અધિકારીઓને ક્રેક કોકેઈન અને ફેન્ટાનાઈલ સહિતના ડ્રગ ખરીદવામાં મદદ કરી હતી. એફિડેવિટમાં આરોપ લગાવવામાં આવ્યો છે કે તેણે પોતાની મોટેલના પરિસરમાં થતાં સેક્સ ટ્રાફિકિંગમાંથી વધારાની કમાણી કરી હતી.