Менің күзім
Жел соқса да, менің күзім - тып-тыныш,
Ол күзімде тұман да бар тым-тырыс.
Қара бұлт та, құйын нөсер, әлсіз күн -
Күзгі аспанда болып жатқан құбылыс.
Басқа адамдар күзді “мұң” деп атайды,
Түсі - қоңыр, салқын ауа, суық үн.
Жаңбыр жауса - сол адамдар жылайды,
Мейлі, оған кінәсі жоқ күзімнің.
Күз ұқсайды ерке мінез қызға да -
Күліп тұрып, жылай кеткен шағында.
Кейде дана әйел болып көрінед:
Сиқырымен жылы құшақ жайғанда.
Білесің бе, қоңыр түс те - бір ғажап,
Күзгі вальс билейді екен жапырақ.
Ешнәрсе де тегін емес әлемде -
Құдай солай мүсіндеген табиғат.