Неміс халқының 12-13 ғасырда жазылған "Нибелунгтар туралы жыр" дастанының тұңғыш рет қазақшалануы.
Аударған. Үміт Нұрғали
Поэзиялаған: Еркежан Арын
Еділ патшаның Кримхилданы айттыру үшін Бургунди жеріне елші жіберуі
Еділ патша патшайымын жерледі,
Хилхе - оның жан жары еді, серігі.
Орын алды мына жағдай сол кезде:
Жар алуды мақсат етті ол лезде.
Жолдастары ақыл айтып қасында
Бір әйелді қатты мақтап айтуда:
- Атақ жолын өзі салған өзіне
Бір жесір бар Бургундидің елінде...
...Марқұм Хилхе адал болды бұл елге,
Қайырымды, теңдесі жоқ әлемде...
Жолдастары көп нәрсені тағы айтты:
«Еділ патша - бар жақсыға лайықты».
- Әлемдегі сіз - ең ірі тұлғасыз,
Сізге өмір сүру керек қайғысыз.
Қайғыңызды сейілтетін - тек әйел
Ер кісінің басын төрге жетелер.
Кримхилда ол - Зигфрид батыр жесірі,
Ақылына сай келетін көрігі.
Сонда Еділ күмәнданып бүй деді:
- Шоқынбаған екенімді біледі,
Ол патшайым христианға сенеді,
Жар болуға маған қалай көнеді?
Егер көнсе ол болады - мұғжиза,
Ғажайып қой, көңіліміз сыйысса».
Жолдастары дайын жауап тағы айтты:
- Әлемдегі сіз боласыз атақты,
Жер жаратын атыңыз бар салмақты,
Есіміңді естімеген кім қапты?
Сондықтан да елші жібер, бақ сынап,
Бір тырысып көру керек жақсылап.
Бізде күмән болмақ емес ешқандай,
Сіз үшін ол - ең лайықты адамдай.
Болар еді қайырымды патшайым,
Қолдап жүрер сіздей ерді әрдайым».
Біраздан соң Еділ патша сөйледі,
Сөйлегенде, достарына бүй деді:
- Мен құптаймын сендер айтқан сөздерді,
Енді шешім қабылдайтын кез келді.
Лайық болса тәж тағуға осы елде,
Бір болуға меніменен келіссе...
Сіз айтқандай, мінсіз болса денесі,
Сұлулығы, сырт келбеті, мінезі.
Сенемін жақсылыққа болады деп,
Кримхилда патшайым келіссе тек...
...Еділ патша көрді де патшайымды,
Оны өзіне жар қылуға ниет қылды.
«Шынында да, сұлулығы, бейнесі -
Менің Хилке патшайымым секілді.
Ай, не деген бұл құдырет десеңші!
Болса егер ер қасында әйелі -
Риза болып жүреді екен күйеуі.
Одан артық әділ адам жолықпас,
Одан асқан жанға дауа табылмас...
Тек әйелдің сүйіспеншілігі -
Ер адамның өмірін етер көңілді».
«Осы істе мен өзіңе сенейін,
Қазынамның көп бөлігін берейін,
Арқа сүйер достарыңды ал ертіп,
Сапарыңа қажетіңді тездетіп
Саған өзім дайындатып беремін:
Киім-кешек, жылқы, тағы керегін...»