Моҳиолам Каримова аз минтақаи дурдасти кишвар аст. Бо вуҷуди ин, тавонист дар коллеҷи тиббии ноҳияи Рашт шомил гардад. Ӯ мехоҳад баъди хатми муассисаи тиббӣ ба ниёзмандони деҳаҳои ноҳияи худ-Лахш, ки имкони ба беморхона рафтанро надоранд, кумак расонад.
Идомаи таҳсили духтарон баъди хатми муассисаҳои таҳсилоти миёнаи умумӣ ва мутахассис шудани онҳо дар ин ё он соҳа бисёр муҳим аст. Вале бархе оилаҳо намегузоранд, ки духтаронашон таҳсил намоянд. Баъди расидан ба балоғат авлавият медиҳанд, ки духтарашон зуд ба шавҳар барояд. Ба ҷойи таҳсил дар муассисаҳои олӣ ва миёнаи касбӣ, корҳое чун пӯхтупаз ва рӯбучуинро дар хона омӯзаду сархам бошаду гапгардонӣ накунад, ҳамин кифоя аст...
Барои ба таҳсил фаро гирифтани ҷавонони минтақаҳои дурдаст, махсусан духтарон, соли 1997 Квотаи президентӣ ихтисос дода шуд. Вазорати маориф соли таҳсили 1997-1998 барои довталабон аз ноҳияҳои дурдасти кӯҳистон дар муассисаҳои таҳсилоти олии касбии кишвар квотаи махсусро ҷорӣ намуд, ки мувофиқи он ҳар сол духтарони деҳоти дурдаст ва аз соли таҳсили 2005-2006 писарони болаёқати деҳоти дурдасти кишвар тибқи суҳбат ба муассисаҳои таҳсилоти олии касбӣ қабул мешаванд.
Аз соли 1997 то соли 2024 аз 61 шаҳру ноҳияҳои ҷумҳурӣ ба 20 муассисҳои олии касбӣ зиёда аз 27322 хатмкунанда тариқи квотаи президентӣ дохил шудаанд, ки аз ин теъдод 16014 духтар ва 11308 писар будаанд.
Монеъ шудан ба таҳсили фарзанд тибқи талаботи кодексҳои ҷиноятӣ, маданӣ ва қонунҳо “Дар бораи маориф”, “Дар бораи масъулияти падару модар дар таълиму тарбияи фарзанд”, ҷавобгарӣ дорад.
Вале ҷавобгарӣ барои монеъ шудан ба таҳсил дар муассисаҳои олӣ ва миёнаи касбӣ дар қонунгузорӣ то кунун таҷассам наёфтааст.
#право
#образованиедетей
#девошки
#университет
#специалист