* * *
Кўзларингда қайғу қуюни
дилга йўллар ғусса хатини.
Сен руҳимга ташриф буюриб,
кечикканинг англамадингми?
Англамадинг...
Эшик ёпганман
тушиб тунлар жазавасига.
Кечалардан роҳат топганман,
чиқиб соғинч кажавасига.
Чор тарафга зир-зир чопганман,
миниб кўнгил аравасига.
Дунё гўзал эди...
Ёшимни,
аритганда нигоҳлар шами,
бармоқларинг ўйнаб қошимни,
лабларимга текканда лабинг,
ёҳуд қолиб сочлар қатида,
бош елкангда топганда шукуҳ,
ёлғиз кўнгил тариқатига,
чанг солганда бир девона руҳ.
Кунлар кечди ҳасратга молик,
эсингдами,
ахир ўша пайт,
қандай гўзал эди жудолик,
қандай гўзал эди аросат...