#pagjurme #odetadume #reportTV
E humbur prej datës 24 qershor, Selime Hasaj nga fshati Peshtan-Bregas i Fierit, nuk është parë nga askush që nga mëngjesi i së shtunës. 37-vjeçarja është larguar e vetme nga banesa e saj, ndërkohë që familjarët janë alarmuar dhe kanë nisur kërkimet në zonë, por deri më tani pa rezultat.
Shqetësimi për fatin e Selimes është i madh pasi e reja vuante nga probleme të shëndetit mendor, ndërsa kishte kohë që kishte ndërprerë mjekimin. Për këtë arsye prindërit e saj Shefqet dhe Dallëndyshe Hasaj e shoqëronin vajzën kudo që ajo shkonte.
Ditën që u largua nga shtëpia, asnjë nga familjarët nuk ndodhej aty, dhe askush nuk di të thotë drejtimin që ka marrë 37-vjeçarja apo rrobat që ajo mund të ketë pasur veshur.
Kjo është hera e dytë që 37-vjeçarja largohet nga banesa, ndërkohë që prindërit, të pashpresë për ta gjetur vetë, kanë denoncuar humbjen e të resë në Komisariatin e Policisë Fier, si dhe kërkojnë ndihmën e emisionit “Pa Gjurmë”.
Emisionin "Pa gjurmë" me moderatore Odeta Dume mund ta ndiqni nga e hëna në të premte në orën 16:00 në ekranin e Report Tv