Муроҷиат барои гирифтани кумакҳои унвонии иҷтимоӣ дар шакли хаттӣ аз тарафи шахс ва ё аз номи оилаи ӯ ба шуъбаю бахшҳои ҳифзи иҷтимоӣ бояд дастрас гардад.
Кумакпулӣ танҳо ба нафарони камбизоат эътирофшуда пардохт мегардад. Шаҳрванде, ки худро камбизоат шуморида, бо сабабҳои объективӣ дар шароити душвори зиндагӣ қарор дорад ва имконияти аз ин ҳолат мустақилона баромаданро надорад, барои гирифтани кумаки унвонии иҷтимоӣ мақомоти маҳаллии ҳифзи иҷтимоӣ муроҷиат карда метавонанд.
Барои дарёфти кумаки унвонии иҷтимоӣ ин ҳуҷҷатҳо бояд пешниҳод карда мешаванд:
- ариза;
- шиносномаи аризадиҳанда
- маълумотнома дар бораи ҳайати оила ва ҷойи истиқомат;
- маълумот дар бораи даромад ва молу амволи ҳамаи аъзои оила.
Ариза, маълумотнома дар бораи ҳайати оилаи камбизоат ва маълумот дар бораи даромад ва молу мулки ҳамаи аъзои оила бо имзои раис ё котиби ҷамоат, ва ё сардори идораи манзилию коммуналӣ тасдиқ бояд карда шавад.
Ҷамоатҳои шаҳраку деҳот, идораҳои манзилию коммуналӣ ва кумитаҳои маҳаллӣ аризаҳои шаҳрвандонро бо замимаҳояш қабул намуда, дар мӯҳлати на дертар аз 10 рӯз ба мақомоти маҳаллии ҳифзи иҷтимоӣ бояд супоранд.
Мақоми маҳаллии ҳифзи иҷтимоӣ ҳуҷҷатҳои аризадиҳандаро барои муайян намудани нишондиҳандаи умумии сатҳи некӯаҳволии оила дар мӯҳлати на дертар аз 10 рӯз ба махзани ягонаи маълумот бояд ворид намояд.
Баъд аз коркарди маълумот дар сервери марказии низоми иттилоотии барномаи компютерӣ тибқи талаботи Методикаи муайян намудани оилаҳо ва шаҳрвандони камбизоат маълум мегардад, ки ба шахс кумаки унвонии иҷтимоӣ таъин карда мешавад ё не.
#пособие
#помощь
#деньги
#Таджикистан
#бедные