Sentare y’iyungururizo ikukira intara ya Gitega yarafashe kuri uno wa kabiri ingingo yo kurekura umupfasoni Emilienne Sibomana yahoze ari umunyamabanga kw’ishure ryisumbuye Christ-Roi ryo ku Mushasha mu gisagara ca Gitega. Ni inyuma y’amezi cumi n’umunani ari mw’ibohero. Emilienne Sibomana akaba yazize kuba yarashize ahabona ishurashuzwa ry’abana b’abigeme biga kuri iryo shure ryakorwa n’umuyobozi waryo. Eulalie Nibizi, umuyobozi nshingwabikorwa mu runani rw’amashirahamwe aharanira agateka ka zina muntu CBDDH, arashima iyo ngingo y’abacamanza. Ariko akaba afise amakenga ko kuva iyo ngingo ifashwe Emilienne Sibomana atararonka uruhusha rwo gusohoka ibohero.