«Өзенмұнайгаз» АҚ демеушілігімен Жаңаөзенде еліміздің әр қиырынан 14 ақын қатысқан «Жүректен атқан жыр бұлақ» атты республикалық айтыс өтті. Жаңаөзен қаласы әкімдігі ұйымдастырған шараның тізгінін ақын, «Дарын» мемлекеттік сыйлығының лауреаты Мэлс Қосымбаев жүргізді.
Рухани азыққа шөлдеген халықтың қарасы көп болып, залда ине шаншар орын болмады. Аламан айтыстың шымылдығын Біржан Байтуов пен Төлеген Жаманов жұбы ашып, Шалқарбай Ізбасаров пен Ержан Амиров байрақты бәсекені жалғастырды. Жыр додасында ерекше көзге түскен Арғынбек Қалбаев пен Мейірбек Сұлтанхан елдік маңызды мәселелерді тілге тиек етіп, ақиқатты астарсыз жеткізді. Бабадан қалған ұлық өнердің түске дейінгі бөлімін Рауан Қайдаров пен Азамат Орынбасаров аяқтады.
Светқали Нұржан, Тұңғышбай Жаманқұлов, Алтынбек Қоразбаев, Мақсат Аяпов, Елдос Еміл қазылық еткен айтыс түстен кейін жалғасып, Абай Жолмағанбетов пен Сезімхан Шұғайып ашты. Жансая Мусина мен Қанат Мырзахан айтыстың көрігін қыздырып, Айбек Қалиев пен Жәнібек Бейбітов жыр бәйгесінің шымылдығын жапты.
Марапаттау рәсімінде компания бас директоры Мақсат Ибағаров құттықтау сөз сөйлеп, барлық қатысушаларға ризашылығын білдірді.
- Айтыстың шаһарымызда республикалық деңгейде өтуіне мұрындық болған «Қазмұнайгаз» ҰК» АҚ басшылығына алғысымды айтамын. Халық қошеметіне бөленген айтыскерлер бағзы өнердің балын тамызды деп есептеймін. Қала тұрғындары үшін осындай рухани шараларды «Өзенмұнайгаз» әрмен қарай да қолдап, бұнымен тоқтап қалмайтынын айтқым келеді, -деді Мақсат Оңғарбайұлы.