Мұрат Құрбанбаев - Жаңаөзен қаласының құрметті азаматы, «Құрмет»​ ордені,​ «Парасат»​ медалдерінің игері. Ардагер мұнайшы!
Мұрат Ізбергенұлы Құрбанбаев қазіргі ҚазҰТУ-ін 1972 жылы бітірген бойдан, Өзен кен орнына маман инженер болып оралады. Ол өзі қатарлы азаматтардан талап қойғыштығымен, зерделілігімен ерекшеленіп, кәсіпшілік жұмысының қиындығына төзе білген жас маман - еңбексүйгіштігі, мамандықты жете меңгеруге деген ынта-жігері мен инстутутта алған білімін нақты өмірдегі тәжірибемен ұштастырды. Азғана жылдар ішінде қарапайым мұнайшыдан бастап, шебер, жетекші инженер, цех бастығы, мұнай саласындағы көптеген іргелі ұжымдардың жетекшісі сияқты жауапты қызметтерді атқарды. Ұңғылардың жерасты жабдықтарын жөндеу саласы мен кенорнына шетел инвесторын тарту, сондай-ақ осы бағыттағы экономикалық-инженерлік шешімдерінің негізін жасаудағы еңбегі бір бөлек.
1994 жылы Мұрат Ізбергенұлы Өзенде құрылған Мұнай газ өндіру бірлестігінің керегесін керіп, шаңырағын көтерушілердің бірі болды. Сол бір ауыр кезеңде тұралап бара жатқан кенорнына жан бітіріп, оның екінші тынысын ашу -кім-кімге де аса қиын шаруа болатын. Нарықтың тұрақсыз, алмағайым заманында кенорнын құлатпай, оның түрлі мәселелерін жігермен шешіп, ел іргесін сетінетпей сақтап қалған Мұрат аға мен оның әріптестерінің еңбегін ерлік десе де болады. Кенорынның қиын кезеңінде міндет пен ауыртпалықты мойнымен көтерген М. Құрбанбаев артынша «Өзенмұнайгаз» ААҚ, «Маңғыстаумұнайгаз» АҚ-ның бас директор қызметтерінде ​ болады.
Қалың бұқараның ортасында дүниеге келіп, елдің, жердің дәстүрін бойына сіңіріп өскен ол үлкен қызметті мойнына алғаннан кейін, бірден әлеуметтік нысандардың жандануына үлес қосады.