Амал күні «Өркен» шағынауданы 44-үй ауласында жаңа ойын және спорт алаңы қолданысқа берілді. 1200 шаршы метр аумақты қамтитын нысан «Самұрық-Қазына» АҚ компаниялар тобы атынан «Samruk-Kazyna Trust» қайырымдылық қорының қаржылай қолдауымен бой көтерді.
- Өткен жылы қор тарапынан Жаңаөзен мен Жетібайда жалпы саны 21 спорт және балаларға арналған ойын алаңы жобасы жүзеге асырылған болатын. Біз үшін қайырымдылық көмек көрсету кезінде жобалардың жүйелілігі және компаниялар тобының кәсіпорындары бар өңірлерді қамту, тұрғындардың әл-ауқатын жақсарту маңызды болып табылады. Бүгінде ашылған және наурыз айының соңына дейін берілетін спорт алаңдары тұтас қоғам игілігіне жарайды деген сенімдемін, - деді «Самұрық-Қазына» АҚ қоғаммен байланыс, әлеуметтік-еңбек қатынастары және еңбекті қорғау жөніндегі басқарушы директор Ғибрат Ауғанов.
Ғ.Ауғанов пен қоғамдық кеңестің төрағасы Аманқос Еділов салтанатты түрде жаңа алаңның лентасын қиды. Шежірежі-ақын Қаржаубай Рейімбаұлы балаларға ақ батасын берді.
Жаңадан ашылған алаңшада ойын элементтері, дене шынықтырумен айналысуға тренажерлар, футбол, баскетбол, волейбол алаңы, демалуға арналған орындықтар, қоқыс жәшіктері орнатылған.
Наурыз айының соңына дейін әрқайсының аумағы 400-ден 1200 шаршы метрге дейінгі тағы да 18 (барлығы Жетібай ауылында 6, Жаңаөзен қаласында 15) спорт алаңы қолданысқа тапсырылады. Аталмыш жобаға барша Қор компаниялар тобы атынан «Samruk-Kazyna Trust» корпоративтік қоры арқылы 1 млрд теңгеден астам қаражат бөлінді.