«Балақай» оңалту орталығында сегізінші баланың тұсауы кесілді. «ЗПМР» диагнозы қойылған Айдын Асқардың тұсауын ӨЭМБ директоры Қуандық Еділов кесті.
Салтанатты шараға аталмыш басқарма кәсіподақ төрағасы Сырлыбай Ерленов пен Арықбай Мәденов, Нұрсұлтан Худибаев, Өтесін Мұрат сынды басқарма жігіт ағалары қатысып, игі лебіздерін білдірді.
ӨЭМБ ұжымы Айдынға пультпен жүретін ойыншық машина сыйлады. Айдынның анасы Әсемай Оразәлиева орталық демеушісі мұнайшыларға, орталық мамандарына шексіз алғыс айтты.
«Қайырымдылық жасап, көмек қолын күткен әрбір жан жүрегіне жылылық ұялатып, өмірге деген құштарлығын оятып жүрген өзенмұнайгаздықтарға өте ризамын. Болашағымыз бақытты болсын десек, бір-бірімізге қолдан келер қамқорлығымызды аямайық»,-деді бақытты ана.
Шара соңында «Балақайдың» директоры Фатима Кенғанова қонақтарды орталық тыныс-тіршілігімен таныстырды.