Таулан Батчаев - Ийнарла
Айт дей эсегиз, да мен айтайым
Сюймеклигими джашырмай,
Юйдеги этерге таукел болгъанма,
Заманны зыраф ашырмай.
Къайсы джанындан чыгъарса, наным,
Къайсы джаныма къарайым,
Ах, толгъан айгъа ушагъан наным,
Джанынга къурман болайым.
Мен къарасам да сен а къарама,
Эси болгъан а айырыр,
Бу экисинде бир палах бард деб,
Саулай тийреге джайылыр.
Джанымы джартысын алгъанса,
Джюрек джаууму ашайса,
Бу къыйынлыкъны къайдан салдынг а
Мен джарлыдан а бошайса
Юсюнгдеги чепкенчигинг, ариу,
Джюрюсенг бир ариу къалтырайд,
Ол къара дугъум кёзчюклеринг а,
Джулдузчукълача джылтырайд.
Мийик тауда, чегет бауурда
Кийик маралла ойнайла,
Кече болса уа, сени кёзлеринг
Мени джукъларгъа къоймайла.
Сен доктор болуб, мен ауруб барыб,
Мадарынг болмаса къарамай,
Кёз туурангдан кетерге унамай,
Дарманларынг манга джарамай.
Мен ийнар айта турама, тенгле,
Кюйген джюрекге джарайд деб,
Сен, къызчыкъ, алай умут этесе,
Саулай дуниягъа къарайд деб.
Мени сюйгеним тойгъа келмейди,
Ол тойгъа келсе кёз болад,
Къатына олтуруб бир джукъ айтыргъа
Худжу тийреде сёз болад
Хар не ишде да иги болады
Къызла арасында семизи.
Джалынсала да, унарыкъ тюлме
Башха къызланы сегизин.
Ма заказ бериб, мен ишлетгенме
Ариучугъуму къобузун.
Гоккакёзню къоюб алаллыкь тюлме
Башха къызланы онусун
Ой, башыбызда кёк канатлычыкь
Салкъын сыртлагьа барады.
Тюрсюнчюгюнг ариу болгъанлыкъгъа,
Халичигинг джюрек джарады.

Сени къарнашынг а дейдиле,
Таулада кийик мараучу.
Сени сюйгенли мен да болгъанма
Сизни арбазгъа къараучу.
Кёзлеринг толгъан Айгьа ушайла,
Ма джангы Айгьа - къашларынг.
Мени джюрегимде бир зат да джогъед
Сюймекликни кесинг башладынг.

Тойну-оюнну бир бек сюесе,
Таймайын тойгьа келесе.
Айтхан сёзюме джууаб бермейсе
Бир аман уллугъа кетесе.
Ой сени ананг бир сейир анад
Башха излесин къызына
Сени ананга кюеу а боллукъ
Къан джаудурлукъду башына

Мен ийнар айта билмейме, къызла,
Кёлюгюз къалыб кетмегиз
Сиз, ийнар айт, деб, айтдырыб, сора
Артдан сёзюмю этмегиз.
Ий, терезени ары ачыгъыз,
Бир ариу аяз урады.
Джарыла эсенг бузул, дегенди
Туурамдан къараб турады.

Туурама сюелиб турма да, ариу,
Алайдан ары кетсенг а.
Сени амалтын тилим тутулад
Меннге бир мадар этсенг а.
Ой, бармагъымдан джюзюгюм , ариу,
Алыб, бармагъынга саллыкъма.
Сени джазыу меннге буюрса,
Ёлмесем, сени аллыкъма.
#karachay #balkar #къарачайджырла @KAVKAZMUSICTV