Төрткүл әлем көз тіккен ЮФС-дің кезекті турнирінде жеңіске жетіп, Алаштың абыройын асқақтатқан бауырымыз Шавкат Рахмонов елге оралғанын барлығымыз білеміз. Иә, Шавкат соңғы жекпе-жегінен кейін көпшіліктің назарын өзіне аударғаны рас. Америка төрінде қазақтың жауынгер ұлт екенін көрсеткен отандасымызға қандай мақтау айтсақ та жарасады. Бір әттегенайы, мұхиттың арғы бетінде көк туымызды желбіретіп, қазақ тілінің мәртебесін арттырған батырымызға лайықты құрмет көрсете алмадық. Алматы әуежайынан Шавкатты төбемізге көтеріп, бір қауым ел болып күтіп алуымыз керек еді. Бірақ бар-жоғы ондаған адаммен Шавкатты қарсы алғанымыз қынжылтады.