کلامِ شاعر بزبانِ شاعر
سلیم احمد
اُسی کو ترکِ وفا کا گُماں ستانے لگے
جسے بُھلاوں تو کُچھ اور یاد آنے لگے
خیالِ ترکِ محبت کو آزمانے لگے
اُسے بھلاؤں تو کچھ اور یاد آنے لگے
اِسے سنبھال کے رکھو خزاں میں لَو دے گی
یہ خاکِ لالہ و گُل ہے، کہیں ٹھکانے لگے
تجھے میں اپنی محبت سے ہٹ کے دیکھ سکوں
یہاں تک آنے میں مجھ کو کئی زمانے لگے
بہار آئی وہ موجِ طرب لہو میں اُٹھی
کہ روح رقص میں آ جائے جسم گانے لگے
یہ اُس کا جسم ہے یا ہے طلسمِ خواب کوئی
اُدھر نگاہ اُٹھاؤں تو نیند آنے لگے
وہ حرفِ تازہ کہ گُل سا کِھلے کہاں سے ملے
کہ زخم بھر گئے اور درد سب پرانے لگے
وہ لمحے بھُول کے جن کو کوئی کمی بھی نہ تھی
جو یاد آئے تو کچھ اور دل دُکھانے لگے
کبھی بہار سے تسکینِ آرزو نہ ہوئی
جو پھول صبح کِھلے، شام کو پرانے لگے
نویدِ دورئ منزل ثبات دے مجھ کو
کہ قُرب سے تو قدم اور ڈگمگانے لگے
وفا بھی حل ہو تو ایسا نہ ہو سلیم کہ پھر
دلِ خراب نئے مسئلے اٹھانے لگے
سلیم احمد