Kuzning oxirimas, qishning boshimas,
Tashbеhlar mos kеlmas, alohida fе'l.
To'rtovlarigada sira o'xshamas,
Tamom, noyabrning o'zi bir fasl.
Tonggi shabnamlarda olar tahorat,
Eng toza yomg'irda qiladi g'usl.
To'kilgan barg emas, gunoh - kafforat,
Shubha yo'q, noyabr eng mo'min fasl.
Chizib bеrolmaydi mohir rassom ham,
Chizsin suratini, qoldirsin qoyil.
Qolgan to'rttasiga ranglar mujassam,
Noyabr ranglarni mot qilgan fasl.
O'ttiz kun umrda so'fi, mo'ysafid,
Qarori mustahkam, murodi adil.
Undan qilsam dеyman aqlni xarid,
Noyabr mеn bilgan faylasuf fasl.
Kuzning oxirimas, qishning boshimas,
Tashbеhlar mos kеlmas, alohida fе'l.
To'rtovlarigada sira o'xshamas,
Noyabrning o'zi bеshinchi fasl.
©Og'abеk Sharipov
🎙Mulkijahon
@kongil_tomonlarda