“Güney Qafqazın problemləri ilə ilk növbədə region ölkələrinin özləri məşğul olmalıdırlar”. Bunu Prezidentin xüsusi tapşırıqlar üzrə nümayəndəsi Elçin Əmirbəyov BBC radiosunun canlı efirində söyləyib.
O xatırladıb ki, “3+3” məşvərətçi regional platformasının yaradılması ideyasını İkinci Qarabağ müharibəsi başa çatdıqdan dərhal sonra Azərbaycan Prezidenti İlham Əliyev irəli sürmüşdü. Bu təşəbbüsün məqsədi Cənubi Qafqazın üç dövləti ilə onların ən yaxın qonşuları olan Türkiyə, Rusiya və İran arasında ticarət, nəqliyyat kommunikasiyaları, enerji təhlükəsizliyi, mədəniyyət, elm və s. kimi perspektivli sahələrdə fəal regional əməkdaşlıq və praktiki qarşılıqlı fəaliyyət üçün mövcud ciddi potensialdan istifadə etməkdir.
İştirakçılar bu il oktyabrın 23-də Tehranda bu formatda keçirdikləri ikinci görüşləri zamanı yekdil qərara gəliblər ki, bölgə ölkələri regional məsələlərin həllində aparıcı rol oynamalı, strateji əhəmiyyətli regionun gələcəyinin formalaşdırılmasında şəxsən və bilavasitə iştirak etməlidirlər. Bu mənada bölgə ölkələrinin kənar oyunçuların regionun işlərinə zərərli xarici müdaxiləsinə qarşı çıxması təbiidir. Bununla belə, sonuncular çox vaxt öz eqoist daxili siyasi mülahizələrinə və maraqlarına əsaslanaraq, hazırladıqları reseptləri Cənubi Qafqaz ölkələrinə sırımağa çalışırlar ki, bu da təəssüf, regionda gərginliyi daha da gücləndirir və uzunmüddətli sülhə nail olmağa imkan vermir.
Elçin Əmirbəyovun sözlərinə görə, bu fenomen daha çox BMT Təhlükəsizlik Şurası, Avropa İttifaqı, Avropa Parlamenti və hətta Frankofoniya Beynəlxalq Təşkilat kimi qurumlarda aparıcı rolundan sui-istifadə edən Fransanın timsalında Azərbaycana qarşı müşahidə olunur. Əfsuslar olsun ki, Paris davamlı olaraq qərəzli, birtərəfli və açıq şəkildə anti-Azərbaycan təşəbbüsləri irəli sürməklə öz daxili siyasi gündəminin girovuna çevrilir və bununla təkcə öz nüfuzuna deyil, həm də Ermənistan-Azərbaycan münasibətlərinin normallaşmasında mümkün vasitəçi ola biləcək Avropa İttifaqının reputasiyasına xələl gətirir.
“Bu yaxınlarda Ermənistana kütləvi silah və texnika tədarükünün başlandığını elan edən Fransa regionda sülh və təhlükəsizlik naminə apardığı siyasətin təhlükəli və yetərincə proqnozlaşdırıla bilən nəticələrinə qətiyyən məhəl qoymayaraq, Cənubi Qafqaz regionunun daha da hərbiləşdirməsi və qarşıdurma yolunu tutub”,- deyə Elçin Əmirbəyov fikirlərini yekunlaşdırıb.