Vilhjálmsvöllur, 3. júlí 2024 - Höttur/Huginn - KF
Það var stutt á milli leikja í þetta skiptið á Vilhjálmsvelli og mikilvægt fyrir heimamenn að ná sér fljótt eftir afar svekkjandi tap gegn Selfossi, efsta liði deildarinnar fjórum dögum áður. Eftir slæm úrslit síðustu fjórar umferðir var liðið að sogast niður í botnbaráttuna þaðan sem gestirnir í Fjallabyggð vermdu botn hennar.
Það var augljóst á öllu að HH ætlaði að byrja leikinn vel og Rafa setti tóninn á 17. mínútu með glæsilegu skoti efst í fjærhornið eftir góðan samleik. Síðan má segja að heimamenn hafi bara hert tökin á leiknum og áttu meðal annars sláarskot og tvívegis hið minnsta varði Javon Jerrod Sample í marki gestanna glæsilega. Staðan í leikhléi var eftir sem áður 1-0 þegar Óli Njáll Ingólfsson dómari leiksins blés í flautu sína.
Síðari hálfleikur var meira af því sama og jafnvel meira úr hendi Hattar/Huginns sem voru miklu líklegri til að bæta við en að KF myndi jafna leikinn. Með eins marks mun var hinsvegar alltaf hægt að finna að eltihrellir HH undanfarinna leikja gæti eyðilagt enn eina ljómandi frammistöðuna. Svo fór hinsvegar ekki og þrátt fyrir nokkur góð tilþrif og ágæt marktækifæri, þá tókst HH ekki að bæta við marki og KF gátu þakkað fyrir að tapið yrði ekki stærra.
Góð stig fyrir HH sem vonandi verða gott veganesti fyrir næsta leik gegn Reyni Sandgerði á Bronsvellinum.
Leikskýrsla: www.ksi.is/mot/leikskyrsla/?l...
www.hotturhuginn.net