Fellavöllur 20. maí 2024 / Höttur/Huginn - KFG
Sólin sýndi sínar bestu hliðar þegar Garðbæingarnir komu í heimsókn á Fellavöll til fyrsta heimaleiks Hattar/Hugins á tímabilinu. Blíðan var hinsvegar aðeins að flýta sér suður svo vindur hafði nokkur áhrif á leik liðanna, sérstaklega þá sem léku á móti blíðunni.
Leikurinn var ekki nema 7 mínútna gamall þegar gestirnir fengu aukaspyrnu rétt utan teigs og Jón Arnar Barðdal setti boltann laglega yfir vegginn og upp í nærhornið. Staðan 0-1. Á 20. mínútu gekk Rafael Llop á lagið eftir slæma sendingu í vörn KFG og renndi boltanum í framhjá Magnúsi í markinu til að jafna leikinn. Staðan var því jöfn í hálfleik.
Það tók heimaliðið 20 mínutur í seinni að komast yfir. Það gerðist í kjölfar glæsilegrar sendingar innfyrir vörn KFG þar sem Martim Sequeira tók laglega á móti boltanum, skautaði framhjá markverði KFA og skoraði örugglega. Öðrum tuttugu mínútum síðar var komið að Sæbirni Guðlaugssyni sem kom heimamönnum í 3-1 eftir góða rispu Árna Veigars á vinstri kanti og skoti sem var varið en Sæbjörn fylgdi vel á eftir og skoraði með skalla í autt markið.
Við þetta færðist meira líf í leikinn og gestirnir gerðu sitt til að sækja stigið. Áttu nokkrar efnilegar sóknir sem enduðu í höndum Ívars í marki heimamanna. KFG uppskar þó gott mark eftir hornspyrnu þegar Guðmundur Ísak Bóasson læddi inn marki á 89. mínútu og léttu nokkrum sinnum reyna á vörn HH undir lokin en án árangurs og fyrsti sigur tímabilsins orðin staðreynd hjá Hetti/Huginn.
Leikskýrsla: www.ksi.is/mot/leikskyrsla/?l...
www.hotturhuginn.net