Қызылорда қаласындағы Назарбаев Зияткерлік мектебінде 7-сыныптар арасында отбасылық эстафета өтті
Салауатты өмір салтын насихаттау арқылы ата-аналармен тығыз байланыс орнату мақсатында ұйымдастырылған спорттық жарысқа 7-сынып оқушылары, кураторлары мен ата-аналары қатысты. Барлығы 6 команда спорт алаңында сап түзеп, 5 кезеңнен тұратын эстафетада күш сынасты.
Жарыстың ашылу салтанатында сөз алған мектеп директоры спорттың адамның денсаулығына тигізер пайдасы зор екендігін айтып, командаларға сәттілік тіледі.
«Деніміз сау болу үшін жүйелі жаттығулар жасап тұруымыз қажет. Бүгінгі жарысқа қатысуға ниет білдірген барлық ата-аналарға алғысымды білдіремін. Мектеп қауымдастығы арасындағы байланысты нығайтатын бұл шара сіздерге жақсы көңіл-күй сыйлайтынына сенімдімін»,- деді Бахыт Жұматай.
Спорттық сайыстың алғашқы кезеңінде ойыншылар шығыршық, футбол мен баскетбол доптарымен жұмыс жасау арқылы белгіленген бағыт бойынша жүгіріп жарысса, екінші эстафеталық ойында гимнастикалық және логикалық тапсырмаларды орындады.
Эстафетаның «Бірлігіміз жарасқан» кекзеңінде қатысушылар кедергілер арасымен секіріп жүйріктігін көрсетсе, «Мерген» эстафетасында теннис ракеткасымен доп ойнау арқылы белгіленген жерге дейін жүгіріп келіп, допты себетке түсіріп, дәл көздеу дағдыларынан сайысты.
Соңғы кезеңде команда мүшелері ұйымшылдықпен шығыршық арқылы кедергілерден өту, сурет қиындыларынан мозайка құрастырудан жарысты.
Спорттық сайыстың қорытындысы бойынша үшінші орынды 7 «В» сыныбынан құралған «Әл-Фараби» отбасылық командасы иеленді. Ал жүлделі екінші орын 7 «С» сыныбының «Жанкент» ойыншыларына бұйырды. Жарыста 7 «F» сыныбының оқушылары жоғары ұпай санымен жеңіске жетіп, жүйрік отбасылық команда атанды.