記者和攝影師遠赴法國街頭為Sony拍照，不但惹來途人目光，也有人耳語說：「Je l'ai vu à France 2! （我在第二台見過她！）」縱然說得一口流利法文，華人要在法國電視登台，又談何容易？
小時候是西灣河街坊，小學放學後就和同學結伴，去太古城中心的Sanrio看Hello Kitty和Little Twins Star；有時做功課也要做到十一、二點。直至家人生意失敗，一家人移民法國小鎮，重新開始。
成為藝人前，Sony畢業於建築系，為了陪伴居於香港的外公而回流。找不到建築師工作，惟有以自由身接室內設計項目和翻譯，就跟現在的「Slash」一樣。不久後在報紙上看到招聘時裝買手，要求巴黎香港兩邊飛，貪靚又會法文的Sony二話不說就去應徵，輕鬆拿下這職位。
但是她始終對舞台念念不忘，深知香港不能實現自小以來的明星夢，被裁員後便回歸法國，從電台小角色做起。
法國人對當地亞洲人的印象不外乎開餐館、開洗衣店、勤力賺錢、說話不多等等，要成名，讓法國人接受亞洲人也可以做藝人、搞創作，Sony的策略就是要「誇張」。言談誇張，打扮也要誇張。「佢哋見到黃種人，個腦會諗到乜先？我俾個example你，成個法國電視台、所有電視台，冇一個黃種人。」直至最近，才有名亞洲面孔的女生上節目教煮fusion菜。Sony稱，自己是當地娛樂圈中唯一一位亞洲人。
「有時我會醜化自己，我會特登扮到好似好唔識嘢，或者做啲好暴發戶嘅行為。因為佢哋法國人個腦入面，對我哋黃種人就係咁睇。我就要做啲嘢，去諷刺佢哋呢個錯誤嘅睇法。」
電視清談節目的情節，或是電台稿，不少也是Sony自導自演。明白內裡意思的觀眾覺得她「抵死」、「頂癮又搞笑」，若有人不明白？Sony笑言：「（佢哋）就好鬼憎我，有啲法國人真係好鬼憎我，佢哋直情覺得，嘩！呢個就係典型中國人啦！最鍾意就係買衫，著到自己懶靚。」
從不否認自己貪靚，更經常出入名店，Sony認為打扮也是一種投資，「我覺得呢個場合我需要呢件衫，呢個我唔慳得，你明唔明？例如一個大型節目，係有sponsor，但係如果你著sponsor嘅衫，你同隔籬啲同事咪差唔多款囉？」網上的照片和短片，極少見她以相同裝束示人；買了新衫新鞋，又會立刻上載照片跟粉絲分享。
不是要顛覆法國人對亞洲人的所有刻板印象，但起碼要展示，創作不是「白人」的專利。雖頻頻上電視和主持電台節目，但編劇費才是Sony收入的主要來源，「呢度你寫一啲搞笑嘅環節，或者劇本，全部會計番晒版權費。」
用廣東話教網民說法文，又在巴黎教法國人說廣東話，她說早於在香港居住的十一年，已經塑造了她的港人特質，而且現在還會發噩夢，夢到小學上課時突擊測驗。
在法國工作十多年，她仍然未能接受外國人寓工作於娛樂的習慣。「啲鬼仔好鬼死心散㗎嘛，一路彩排一路睇手機，一陣間又溝女，一陣間又蹦蹦跳打個筋斗，我就𤷪晒嘅。」她心目中的香港人做事認真，還有輕微「磨爛蓆」，「一路做嘢、一路開心、一路笑、一路遊戲嗰啲，我唔識㗎！做嘢就做嘢，食嘢我都可以skip。」
【樂觀便無敵】男兒身女兒心 Sony Chan：係我嘅trademark！
bit.ly/2vX9Z0V
撰文：劉卓瑩
攝影：劉瑜
攝錄：楊雯暄
壹週Plus : hk.next.nextmedia.com
即 like 壹週Plus fb : nextmagazinefansclub