إهداء لاخي الغالي الشيخ
طلال المشعل الاحمد
ياشيخ مضمون الخواطر تباره
ولك يابومشعل مع هوى صيد الاقفار
القلب مولع بالقنص والصقاره
وشوف الفجوج الخاليه عقب الامطار
ماهمكم زود التعب والخساره
تقطع ميادين الوعر وقت الأخطار
واليوم شوف القيظ عود لداره
عقب البطا جانا من البعد حدار
وانا سوات اللي مجود شكاره
بس أتسلى بالتفاكير محتار
يطري علَي عايض اليا شب ناره
في خايعٍ قفرٍ مع شق الانوار
وربعٍ قرومٍ من مواكر حراره
وشوف الطيور مفرعاتٍ بالاوكار
ويازين مرواح الجيوب اتباره
احدٍ رقا واحدٍ مع الجو حدار
والعين عين اللي طلع واستداره
في راس مشرافٍ على كف صقار
طلعه يمين وراح ينطح يساره
وحنا خلافه ناخذ يمين ويسار
قام يترقا مرهيٍ في طياره
روح ويمنهن من البعد مختار
وحول على روضٍ تزاما خضاره
عشبه جديد وبادين فيه نوار
وقامن من أقصى الروض مثل العذاره
وهو مضايف خربهن ما بعد ثار
وقمنا نفرقهن بفن وشطاره
والخرب ينتف داغره واف الأشبار
طرح الشبك خالط شقاره غتاره
عدل المناكب منوة الخرب لا طار
و‏صار المضحى في مصيد الحبارى
‏وريش الغلب يلعب على رووس الأشجار
غرام شيخٍ ما يهاب الخساره
طلال ابن مشعل له المجد والكار
عساه يسلم ريف ضيفه وجاره
شيخ التواضع والكرم نسل الاخيار
ال الصباح اهل الوفا والاماره
اللي نماري بحبهم سر وجهار
وياشيخ مضمون الخواطر تباره
ولك يابومشعل مع هوى صيد الاقفار
#مشعل_الحبيني