يا صاحبي في الناس معطى ومحروم
من عاد خلق الله في غزو وسبي
وما زال نفس الحال والحكمه تدوم
من خالق الدنيا على ما هو يبي
الشيخ عاده شيخ .. حاكم ومحكوم
ولا الصبي طول الزمن يبقى صبي
ولا صرت من ناس يسدون اللزوم
لا تنخضع لاهل المشالح والعبي
ارفع مقامك لا تشبّه بالرخوم
الطيّب اتعب معه واللاش يهبي
والناس تعرف كيف توزيع القسوم
خذ مكسبك وانا بسنع مكسبي
ولا تحسب اني من رديين العزوم
اللي على درب الوفا تحبي حبي
الكسب من يمناي والعز محسوم
والحمد لله ورث من جدّي وابي
ولا شكيت من الزمان ابا الهموم
ولا ذرف دمعي ولا بل هدبي
ولاني باطوّف كل ليل وكل يوم
ايات كلمه طايشه من صاحبي
الاوله من صاحبي عنها بشوم
وماهو على شانه على شان شنبي
به شاربٍ لازل ،، غالي ومحشوم
وبه شاربٍ ماهو بكفوٍ لتعبي
والثانيه والثالثه لاجل السلوم
وان طوّلت يار نار شبي والهبي
يعني العلوم اللي تقفاها علوم؟!
تعمي عيوني خص لا ثار غضبي
وما عاد اميّز في الدفاع من الهجوم
لا جات كورة لعبهم في ملعبي
اشوتها قدام والقايم يقوم
واليا وصلت الظاميه قلت اشربي
ولا انت مدري وش تبيع و وش تسوم؟
من يوم خليت الذكي مثل الغبي
راحت عليك ام المخابي والكموم
واليعربي يعرف كلام اليعربي
واليا بغيت تعرف تفسير الحلوم
مسيلمه كذاب ... ومحمد نبي