Bu gün Şuşanın mərhum icra başçısı Mikayıl Gözəlovun ruhu şaddır. Onun qızı Səbinə Gözəlova isə illərdir ürəyində saxladığı ən böyük arzusunu reallaşdıracaq. Artıq Şuşanın üzərindən qara buludlar çəkilib. Noyabrın 8-də Azərbaycanın müzəffər ordusu Şuşanı 28 illik düşmən tapdağından azad edib.
Şuşada müxtəlif vəzifələrdə çalışan Mikayıl Gözəlovu ermənilərin torpaq iddiaları narahat edirmiş. Elə bu səbəbdən Milli Ordunun ilk rəsmi hərbi hisələrindən olan 816 saylı Şuşa ərazi özünümüdafiə taborunu yaradanlardan biri olub. Səbinə Gözəlova deyir ki, 1991-ci ildə çox qısa bir müddətdə Şuşaya rəhbərlik edən Mikayıl Gözəlov vətənpərvər insan olub. 1991-ci ilin dekabrın 11-də ermənilərin sui-qəsdi nəticəsində qətlə yetirilən icra başçısının yoxluğu Şuşanın işğalını da surətləndirib.
Həmsöhbətim deyir ki, atası Şuşanı hər zaman abad, firavan görmək istəyirdi. İcra başçısı işləyən zaman gecə-gündüz dayanmadan işləyən Mikayıl Gözəlovun hətta Şuşada memarlıq nümunələrinin inşasında da rolu olub. Şuşanın istər hərbi, istərsə də iqtisadi cəhətdən güclü görmək istəyən Mikayıl Gözəlovun Şuşa sevgisi dillərdə dastan idi. Bu sevgini övladlarına ötürən bu qəhrəman şuşalının ailəsi indi o torpaqlara qayıdacaqları günü səbirsizliklə gözləyir.
Əslən Ağdamın Mərzili kəndindən olan Mikayıl Gözəlov ata-baba yurdunda dəfn olunub. İllərdir ata qəbrini ziyarət edə bilməyən Gözəlovlar ailəsi böyük ümidlə o torpağa ayaq basacaqlarına inanır.