Үкімет отырысында туризмді дамыту мәселесі қаралды. Былтыр елімізде туристік саланы дамытудың 2023-2029 жылдарға арналған тұжырымдамасы бекітілген болатын. Туристік саланы талқылаған арнайы мәжілісте облыс әкімі маңызды мәселелерді баса айтып, жауапты басшыларға бірқатар тапсырма берді.
Туризмді дамыту - өңірдің экономикалық жағдайын жақсартып, әлеуметтік мәселелердің шешілуіне ықпал етеді. Өткен жылдың қорытындысымен аймақта туризм саласындағы нысаналы индикаторлардың орындалу көрсеткішінде оң динамика қалыптасқан. Салаға салынған инвестиция көлемі 20,7 млрд теңгені құрап, жоспар ойдағыдай орындалған. Дегенмен белгіленген меженің орындалу барысы төмен аудандар да бар.
Былтыр аймақта ішкі туристер саны 113 мың, сыртқы туристер саны 3980 адамға жеткен. Облыста 4195 орынға лайықталған 150 орналастыру жайы бар. Өңірдің туристік әлеуетін арттыру бағытында нақты шаралар қабылданып, сәуір айында Еуроодақ елшілері Сыр өңіріне арнайы келіп, инвестициялық мүмкіндіктермен танысты. Облыс әкімі бұл бағыттағы шараларды дамыту үшін әкімдерге бірқатар тапсырма жүктеді.
«Батыс Еуропа - Батыс Қытай» автокөлік дәлізінің облыстағы бөлігінде 53 жол бойы қызмет көрсету кешені жұмыс істейді. Былтыр туристерге тартымды орындарда 17 санитарлық-гигиеналық торап талаптарға сәйкестендіріліп, күтіп ұстау шығындары мемлекет есебінен субсидияланған. Биыл 21 нысанға мемлекеттік қолдау шаралары көрсетілмек.
БЫЛТЫР 9 ОРМАН ӨРТІ БОЛДЫ
Күн тәртібіндегі екінші мәселе - орман өртінің алдын алу. Облыста мемлекеттік орман қорының жалпы көлемі 7 миллион гектарды құрайды. Өткен жылы осы алқаптарда 9 орман өрті тіркелген. Соңғы екі жылда орман шаруашылығы мекемелерінің материалдық-техникалық базасын нығайтуға 1,5 миллиард теңгеден астам қаржы бөлінген. Облыс әкімі әлі де болса нәтиже көңіл көншітпейтінін жеткізді.
Аймақ басшысы өрт бекеттерін қажеттілігіне қарай салуды тапсырды. Әрі елді мекендерді зерделей отырып, жақын орналасқан аумақтардың тиімділігін ескеру қажет деді.
Сайт - qyzylordatv.kz/ru/live
Facebook - / qyzylordatv
Instagram - / qyzylordatv
Telegram - t.me/qyzylords_tv
Tiktok - / qyzylorda_tv