ҚР Президенті Қ. К. Тоқаевтың 2021 жылғы 10-шілдеде ҚР Үкіметінің кеңейтілген отырысының қорытындысы бойынша берілген Қызылорда, Жетісу және Түркістан облыстарында жалпы қуаты кемінде 1500 мегаватты құрайтын электро-генерациялаудың маневрлік режимі бар бу-газ қондырғыларын салу жөніндегі жобаларды іске асыру тапсырмасын орындау мақсатында және ҚР Президентінің 2021 жылғы 13-қыркүйектегі №659 Жарлығымен бекітілген Мемлекет басшысының 2021 жылғы 1-қыркүйектегі "Халық бірлігі және жүйелі реформалар - ел өркендеуінің берік негізі" Жолдауын іске асыру жөніндегі Жалпыұлттық іс-шаралар жоспарының 61-тармағы аясында «Түркістан облысының Сайрам ауданында қуаттылығы 1000 МВт БГҚ негізінде электр станциясының құрылысы» басым жобасы іске асырылуда.
Ауқымды жоба Қазақстанның энергия жүйесінің сенімділігін арттыруға, жетіспейтін энергетикалық қуаттардың орнын толтыруға және Орталық Азияның энергия жүйесі құрайтын авариялық кернеуді теңестіруге мүмкіндік береді. Сондай-ақ, бұл электр станциясы әлеуметтік тіршілікті қамтамасыз ететін объектілерді өздігінен үздіксіз энергиямен қамтамасыздандыра алады. Сонымен қатар:
Қазақстан Республикасының Оңтүстік өңірін электр энергиясымен қамтамасыз етеді;
Республиканың Солтүстік аймағынан Оңтүстік аймағына электр энергиясын беру кезіндегі ысыраптарды азайтады;
Қазақстанның көрші елдерге энергетикалық тәуелділігін төмендетеді;
Бір қуат бірлігі үшін атмосфераға шығарылатын зиянды шығарындылардың үлестік көлемін кемітеді;
Қазақстан Республикасының Оңтүстік өңірінде жұмыссыздықпен күресуге айтарлықтай септігін тигізеді.
Басым жобаны іске асыру үшін құрылыс барысында 3200-ге жуық, ал электр станциясы қолданысқа берілгеннен соң 400-ден астам тұрақты жұмыс орындары ашылмақ.
Басым жобаны іске асыру мақсатында, «Самрук-Қазына» АҚ еншілес компаниясы болып табылатын «Түркістан БГҚ» ЖШС мен Оңтүстік Кореяның ірі қаржы-өнеркәсіп топтарының бірі, бүкіл әлем бойынша кең ауқымды өндірістері мен өкілдіктер желісі бар халықаралық Doosan Group (Dusan Group) корпорациясы және отандық «Bazis Construction» ЖШС-мен құрылған консорциум арасында «Толық құрылыс» келісім-шарты түзіліп қол қойылды.