StarTalk一氣呵成版丨支嚳儀稱揀Demo心情如選婚紗｜ 無怪責當年媽媽反對自己入行｜HK E News 娛樂新聞報道
Venus Chi Chi 支嚳儀 雖然參加完《中年好聲音》，又喺唔少騷上一展過歌喉，但因為一直以嚟都未有一首屬於自己嘅個人歌曲，所以佢總係覺得自己未稱得上係一位歌手。直到最近佢推出自己首支廣東歌《Gotta Try》，Venus先話自己可以喺創業家/媽媽後，加上「歌手」呢個職業呀。
Venus呢日接受 許文軒 Edmond Hui 《StarTalk》嘅訪問，對方問到佢有冇怪過媽媽當年一直反對佢入行做歌手？Venus坦言細個、心智未成熟時，有諗唔通點解自己唔可以去試，但就冇怪過媽咪唔畀自己去試。雖然喺當年參加《TVB全球華人新秀歌唱大賽2010》時曾奪「網絡最具人氣獎」，但Venus話因為媽媽思考事情嘅維度較高，當時對方反問佢點解一定要讀書完就入行？唔再歷練一下自己先？Venus指而家諗返轉頭，當時媽媽喺佢無任何保護網之下，唔贊成佢入行係做得好啱。
作為新手第一次聽Demo揀屬於自己嘅歌時，Venus話成件事好似揀婚紗一樣，當佢聽到《Gotta Try》Demo嗰一刻，就好似揀中命中注定嘅婚紗。由於過往都係唱英文歌多，所以Venus收到新歌歌詞嘅第一時間，就去咗搵韋綺姍幫佢改善廣東歌嘅技巧，佢仲話而家睇返當日參加《中年好聲音》嘅比賽片段，有種慘不忍暏嘅感覺呀。
外人睇Venus就覺得佢係人生勝利組，但Venus就話自己係「人生情商組」，因為佢覺得經歷嘅苦難只有自己知，但佢唔會將呢啲嘢掛喺嘴邊，同朋友閒聊嘅時候都係會傾點樣去解決個問題，而唔係喺情緒中沉溺，Venus話只要大家將個情商抬高，擴大內心，大家都可以係人生勝利組。
#StarTalk #支嚳儀 #Venus #廣東單曲 #許文軒 #出歌 #Demo #陳考威 #GottaTry #中年好聲音 #音樂會 #唱跳 #歌曲 #一氣呵成版
#TVB #無綫新聞 #News #StayHome #WithMe #跟我一樣 #宅在家