ಕಡಲಪ್ಪೆನ ಬಂಜಿದಡಿತ್ತ ಒಂಜಿ ಪುಂಡಿ ಮಣ್ಣಡು. ತಾದಿಗೊಂಜಿ ಕಲ್ಲ್ , ಕಲ್ಲ್ ಗೊಂಜಿ ಪೂತ ಎಸಲ್ ಪಾರ್ದ್ ನಂಬೊಂದು ಬೈದಿನ ಬೆರ್ಮೆರ್ ಸೃಷ್ಟಿದ ತುಳುವನಾಡ್ ದ ಸತ್ಯದ ಕಲಟ್ ನೆಲೆಯಾಯಿನ ಏಳ್ ಜಿಡೆತ್ತ ಸಂಕಮಾಲೆನ್ ತರೆಟ್ ಏರೊಂದು ಕೈ ಟೊಂಜಿ ಬಿರು ಪಗರಿನ್ ಪತ್ತೊಂದು 😍ಬೊಲ್ಪು ಕೊರ್ಪುನ ತುಳುವ ಮಣ್ಣ್ಡ್ ಕಾರ್ನಿಕೊಡು ಮೆರೆಯಿನ ಸತ್ಯೋಲೆನ ಪುಟ್ಟುಪುರಾಪು...
ಕಾರ್ಲ ಬೈರವಸೂಡ ಅರಸುಲ್ ನ ನಾಡ್ ಡ್ ಅಜಿಪ ಒಕ್ಕೆಲ್ ದ ಮುಗೆರ್ಲು ಬೆನ್ನಿದ ಬೇಲೆ ಮಲ್ತೊಂದು ಪೆದ್ದಿ ಅಪ್ಪೆಲೆಕ್ಕ ಮುಗೇರ್ಲೆನ್ ತುವೊಂದು ಇತ್ತೆರ್ ಇಂಚ ಅಜಿಪ ಒಕ್ಕೆಲ್ ದ ಮುಗೆರ್ಲೆನ ದಂಡ್ ಬಿರು ಪಗರಿಡ್ ಬೊಂಟೆ ಜಯಿಪುನೈಟ್ ಬರಿ ಬಿರ್ಸೆರ್.. ಉಂದೆನ್ ಮಾತ ತುಯಿನ ಮಂತ್ರಿ ಬೊಮ್ಮನ್ನಗ್ ನಂಜಿ ಪುರ್ಜಾಂತ್ರ ಮೈಯೊರ್ಮೆ ಸುರು ಅದ್ ಮುಗೇರ್ಲೆನ ಮಿತ್ತ್ ಪಗೆ ಸಾದಿಸಾವೊಂಡುಂದ್ ಕಾಪ್ವೆ.. ಅಂಚ ಒಂಜಿ ದಿನ ಘಟ್ಟದ ಮಿತ್ತ್‌ದ ರಾಜ್ಯೋರ್ದ್ ಕಪ್ಪ ಕಾಣಿಕೆದ ವಿಷಯಡ್ ಒಲೆ ಕೊರ್ಪೆರ್.ಭೈರವ ಸೂಡ ಅರಸು ಅಜಿಪ ಒಕ್ಕೆಲ್ ದ ದಂಡ್‌ನ್ ಸೇರಾದ್ ಘಟ್ಟ ದ ಮಿತ್ತ್ ದ ರಾಜ್ಯೋನ್ ಬೆದ್ರ ಪುಂಡೆಲ್ ದ ನಡುಟು ಕುಲ್ದು ಬಿರುಪಗರಿ ಬುರ್ದ್ ಕಾರ್ಲದ ಊರುಡ್ ಸಾರ ಸಾರ ತೂಟೆಪೊತ್ತಾದ್ ದಂಡ್‌ನ್ ಜಯಿಪುವೆರ್. ಅಂಚ ಬೈರವಸೂಡೆ ಮುಗೆರ್ಲುಗು ಕೊರ್ನ ಭಾಷೆದ ಪ್ರಕಾರ 7 ಅಡಿ ಭೂಮಿಡ್ ಒಂಜಿ ಅಡಿ ಭೂಮಿ ಕೊರ್ಪಿನ ಬಾಸೆನ್ ಮಂತ್ರಿ ಬೊಮ್ಮನ್ ನ ಪಾತೆರ ಕೆನ್ದು ಕೊರಂದೆ ಅಜಿಪ ಒಕ್ಕಲ್ ದ ಮುಗೆರ್ಲು ಜೆತ್ತಿನ ಜಾಮಂದ ಪೊರ್ತುಗ್ ಪೊರ್ತುಗು ಸೂ ಪೊತ್ತಾದ್, ಸುಡು ಸುಕರಿ ಮಲ್ತ್ ಸಂತಾನ ಅಲಿಪುವೆರ್.ಉಂದೆನ್ ಬತ್ತ್ ತೂಯಿನ ಅರಸುಲ್ನ ಕಣ್ಣ್‌ಗ್ ಒಂಜಿ ಅನ್ ಬಾಲೆ ಮಿರೆ ತಿನೊಂದ್ ಇಪ್ಪುನ ತೂದು ಆರ್ ಬಾಲೆನ್ ತನ್ನ ಅರಂತಿಲ್ಲಗ್ ಲೆತೊಂದು ಪೋಪೆರ್. ಎಲ್ಯ ಪೋದು ಮಲ್ಲ ಅದ್ ಬಾಲ ಬರವಣ ಒಡಿ ಪುದರ್ ದೀದ್ ಪದಿನಾಜಿ ವರ್ಷದ ಜವಾನೆ ಆಪೆ. ಅಂಚ ಬೈರವಸೂಡೆ ಅರಸೆರ್ನಾ ನಂಜಿ ಮಚ್ಚರ ದ ಸತ್ಯ ಗೊತಾಪ್ಪುಂಡು....ಪಂಡಿ ಪಾತೆರ ನಡಪಂದಿನ ಅರಸೆರ್ನಾ ಬೂಡು ಡ್ ನನ ಉಂತಾಯ ಪಂದ್ ಕಾರ್ಲದ ಊರುನ್ ಬುರ್ದ್ ಪೋಪೆರ್. ನುಪ್ಪು ನೀರ್ ದಾಂತಿನ ಬರವನ ಓಡಿ,ಸಾದಿಡ್ ಪೋನಗ ತಿಕಿನ ಬುಗಟೆ ಮುಗೇರನ ಇಲ್ಲಡೆ ಪೋಪೆರ್,ಆರ್ನ ಕತೆ ಕೇನ್ನ ಬುಗಟೆ ಮುಗೇರೆ ತನ್ನ ಇಲ್ಲಡೆ ಉಂತೆರೆ ಪನ್ಪೆರ್.ಅಂಚ ಆನ ಸಂತಾನ ದಾಂತಿನ ಆರ್ನ ಮಗಳ್ ಕುಂಞ ಮಟ್ಟೇದಿನ ಕೈ ಪತ್ತ್ ದ್ ಸಂಸಾರ ನಡಪಾಡ್ ಕೆಮ್ಮಲೆತ ಬೆರ್ಮೆರೆನ ಆಶಿರ್ವಾದೊಡು ಕುಂಞ ಮಟ್ಟೇದಿ ಬಂಜಿ ನಾಲ್ ಅದ್ ಎನ್ಮೂರ ದೇರಣ್ಣ ಬಲ್ಲಾಲೆರ್ನ ಅರಂತಿಲ್ಲಡ್ ಅಮರ್ ಬಾಲೆಲೆಗ್ ಜನ್ಮ ಕೊರ್ದು ಪದಿನಾಜಿ ದಿನತಾನಿ ತೊಟ್ಟಿಲ್ ಪಾರ್ದು,ಆಣ್ ಬಾಲೆಗ್ ಎನ್ಮೂರ ದೈಯ್ಯು ಬೊಕ್ಕ (ಪೊನ್ನು) ಬಾಲೆಗ್ ತನ್ನಿಮಾನಿಗ ಪುದರ್ ದೀಪೆರ್ . ಅಂಚ ಬಂಜಿಡಿತ್ತಿ ಕಪ್ಪಲ್ ಜಾವೊಡಾಂಡ ಪಂತಿನ ಪರಕೆ ಸಂದಾವೆರೆಗ್ ಕೆಮ್ಮಲೆತ ಬೆರ್ಮೆರೆನ ಕ್ಷೇತ್ರೊಗ್ ಪೋನಗ ಸಾದಿಡ್ ಕುಮಾರ ಸುದೆಟ್ ಮೀಯೆರ್ ಪೊದು ಕುಂಞ ಮಟ್ಟೇದಿ ಬೊಕ್ಕ ಬರವನ ಓಡಿ ಕಲ್ಲ್ ಜರ್ದ್ ನೀರ್‌ಡ್ ಮುರ್ಕುಡು ಬೊಲ್ಲಾಡ್ ಪೋಪೆರ್. ಅಪಗ ದಿಕ್ಕ್ ದೆಸೆ ದಾಂತಿನ ಪಲಯೆ ದೈಯು ತಂಗಡಿ ತನ್ನಿ ಮಾನಿಗನ ಕೈಟ್ ಪತೊಂದು ಎರಾಜೆ (ಬರ್ಕೆದ) ಕಟ್ಟ ಪುಣಿಟ್ಟ್ ಪೊನಗ ಸಾದಿಡ್ ಸೊನ್ನೆಸೋಯಿ ಬೈದೆದಿ ಕಡ್ಯದ ಕಲಿ ತುಂಬೊಂದು ಪೋನಗ ರಡ್ಡ್ ಜೋಕುಲೆನ್ ತೂದು, ಏರ್ ಮಗ ಜೊಕ್ಲೆ ಕೆನ್ನಗ, ಎಂಕುಲು ಗತಿ ಗೋತ್ರ ದಾಂತಿನಕುಲು, ಕೈ ನಿಲಿಕೆ ಬೇಲೆ ಬಂಜಿ ನಿಲಿಕೆ ಗಂಜಿ ತಿಕ್ಕಿನಡೆಗ್ ಪೋಪಿನಿಂದ್ ಪನ್ನಾಗ ಸೊನ್ನೆಸೋಯಿ ಬೈದೆದಿ ತನ್ನ ಇಲ್ಲ್ ಏರಾಜೆ ಬರ್ಕೆಗ್ ಲೆತೊಂದು ಪೋದು ಪೇರ ನುಪ್ಪು ಕೊರ್ದ್ ಸಾಂಕುವೆರ್. ಅಂಚ. ದೈಯು ಕೈ ಕಂಜಿಲೆನ್ ಮೇಪಾವೊಂದು, ಮಾನಿಗ ಇಲ್ಲದ ಚಾಕಿರಿ ಮಲ್ತೊಂದು ಉಪ್ಪುವಲ್, ದಿನ ಮಗ್‌ರ್ಂದ್ ಪೋಯಿನೆ ಒಂಜಿ ದಿನ ತನ್ನಿ ಮಾಣಿಗ ಪೊನ್ನು ಪೋದು ಪೊಂಜೊವ್ ಆಪಲ್. ಕೆಲತ ಪೆರ್ನು ಪನ್ಪಿನ ಕೈ ಕಂಜಿಲೆಗ್ ಮರ್ದ ಕೊರ್ಪಿನ ಪಂಡಿತ ಗ್ ಮಾನಿಗ ನ್ ಮದಿಮೆ ಮಲ್ತ್ ಕೊರ್ಪೆರ್ ಅಂಚ ಕಾಲ ಮಗ್‌ರೊಂದ್ ಇತ್ತಿಲೆಕನೆ ಎನ್ಮೂರ ಬೂಡುಡು ವರ್ಸೊಗೊರ ಮಾಲಕರಿಯದ ಲೆಕ್ಕೊಡು ಸಣ್ಣ ಸೀರ್ಬೆದ ಇಂದ್ ಮರತ್ತ ಬಿರು ಮಲ್ತ್ ಕೋಟಿ-ಚೆನ್ನಯ್ಯರೆನೊಟ್ಟು ಬೋಂಟೆಗ್ ಪೋಪೆರ್.ಅಪಗ ಕೆಮ್ಮಲೆತ ಬೆರ್ಮೆರ್ ಬೆರಣನ ಒರು ಆದ್ ಬೋಂಟೆಗ್ ಪೋಪುನ ತೆರಿದ್ ಪೆರ್ಮಲೆ ಕಾಡ್ ಬುರ್ದು ನಡುಟ್ ಇತ್ತಿನ ಸೀಮುಲ್ಲ ಸೀತ ಮಲೆಟ್ ಬೋಂಟೆ ದೇರ್ಲೆ ಪನ್ನಗ ಪಿಲಿ ಬರ್ಪುನ ಗಂಡಿಡ್ ಮುಗೆರ್ಲು ಉಂತುದು .ಪಂಜಿ ಬರ್ಪುನ ಗಂಡಿ ಡ್ ಕೋಟಿ-ಚೆನ್ನಯ್ಯ ರ್ ಉಂತುದು. ಪಂಜಿನ್ ಮುಗೆರ್ಲು ಜಯಿತ್‌ದ್ ಅಡ್ಡ ಪಾಡುವೆರ್ ಅಪಗ ಕೋಟಿ-ಚೆನ್ನಯ್ಯ ರ್ ಮುಗೇರ್ಲೆನ ಬಿರು ಪಗರಿದ ಶಕ್ತಿನ್ ಪರೀಕ್ಷೆ ಮಲ್ಪುನಗ ಸೈತಿ ನ ಪಂಜಿ ನ್ ಸಿರಿಗಿಂಡೆ ನೀರ್ ನಾಗದರ್ಬೆದ ಕಡ್ಡಿ ನ್ ಕಿನ್ನಿದಾಡೆಗ್ ಬುರ್ದು ಜೂವ ಮಲ್ಪುವೆರ್ ಅಪಗ ಸೈತಿನ ಪಂಜಿ ಜೂವ ಅದ್ ಬಲಿಪುನಗ ಮುಗೆರ್ಲು ಪಗರಿ ಬುರ್ದು ಅಡ್ಡ ಪಾಡ್ನಗ ಪಂಜದ ಗಡಿ ತ ಉಲಯಿ ಪಂಜಿ ಬೂರುಂಡು. ಅಪಗಾ ಪಂಜ ದ ಜವನೆರ್ನ ಒಟ್ಟು ವಾದ ವರಂಟ್ ಅದ್ ಸೈತಿ ಪಂಜಿನ್ ಮಂಜಲ್ ಪಾದೆಗ್ ಕನಪೆರ್ . ಅಪಗಾ ಪಂಜಿ ದ ಮಾಸದ ವಿಚಾರೊಂಡು ಕೋಟಿ ಚೆನ್ನಯೆರ್ನ ಒಟ್ಟುಗು ತರಬೇದ ಅದ್. ಕಾಡ ಬೋಂಟೆ ಕಲ್ವ ಬೋಂಟೆಗೆ ,ನೀರ ಬೋಂಟೆ ನಿಜ ಬೋಂಟೆಗೆ, ಪಂದ್ ನೀರ್ ಡ್ ರಡ್ಡ್ ತರು ಆಂಡಲ ತಿಕ್ಕು ಪಂದ್ ಸೊನ್ನೆ ಸೊಯಿ ಭೈದೆದಿನ ಪಾತೆರ ಕೆನಂದೆ
ಬೆರ್ಮೆರ್ ನ ಜಳಕ ದ ಗುಂಡಿ ಗ್ ಕಡು ಪಡುವೆರ್. ಅಂಚ . ಕಡು ಪಾರ್ದ್ ಮೀನ್ ಪತ್ತೆರೆ ಗುಂಡಿಗ್ ಜಪ್ಪೆರೆ ಪೋಪೆರ್, ಬೊಂಟೆಗ್ ಪೋಯಿನ ದೈಯು ಬೊಕ್ಕ ಪೆರ್ನು ಪೊಯಿನಕುಲು ದಾನೆ ಬತ್ತ್‌ಜೆರ್ ಪಂದ್ ಸೊನ್ನೆ ಸೊಯಿ ಬಯಿದೆದಿ ಬೆರ್ಮೆರ್ ನಾ ಗುಂಡಿಡೆಗ್ ಪೋನಗ ಜೈದಿನ ಪಜ್ಜೆ ತೋಜುಂಡು . ಅಪಗ ಬೆರ್ಮೆರ್‌ನ ಗುಂಡಿಗ್ ಪಾಡಿ ಸೊತ್ತು ಮುರ್ಕಡ್.ಮುರ್ಕಿ ಸೊತ್ತು ನೆಗತ್ ಬರಡ್ ಪಂದ್ ಬೆರ್ಮೆರೆನ್ ನೆನೆತ್ ತನ್ನ ಕೈತ ಮುದ್ರೆದ ಉಂಗಿಲನ್ ಗುಂಡಿಗ್ ಪಾಡುವೆರ್. ಅಪಗ ಜೋಡು ಪುನ ಮಿತ್ತ್ ಬರ್ಪುಂಡು ಅಂಚ (ತನ್ನಿಗುಡ್ಡೆಡ್) ಜೋಡು ಕಾಟ ಏರಾದ್ ಎನ್ಮೂರ ದೆಯ್ಯು ಬೊಕ್ಕ ಕೆಲತ ಪೆರ್ನುನ ಪುನನ್ ಕಾಟದ್ ದೀಪೆರ್.ಆತಾನ ಪೊರ್ತುಡ್ ಇಸಯ ತೆರಿಯಿನ ತನ್ನಿಮಾನಿಗ ( ಬೇನೆ ಬೆಸರ್ ಡ್ ಕಣಾನೀರ್ )ಪಡೊಂದು ಕಾಟದಡೆ ಬರ್ಪಲ್. ಅಪಗಾ ತಾನ್ ಕೆಮ್ಮಲೆನ ಬೆರ್ಮರೆನ ಅನುಗ್ರಹಡ್ ಪುಟ್ಟಿನ ಮಗಲಾಂಡ ಎನ್ನ ಪಲಯೆ, ಕೈ ಪತ್ತಿನ ಕಂಡನಿ ಜೂವ ಅಂದ್ ಬರೊದು ಪಂದ್ ಕಾಟೊಗ್ ಮೂಜಿ ಸುತ್ತ್ ಬತ್ತ್‌ದ್ ಕಾಟೊಗ್ ಕೈ ದೀನಗ ಕಾಟ ಕಲ್ಲಾದ್ ಗೆಜ್ಜೆತ್ತಿ ಪಿಂಗಾರ ಪತ್ತೊಂದು ಉದಿಪನ ಆಪಲ್..ಮುಗೇರ್ಲು ಕಾಯ ಬುರ್ದು ಮಾಯಾ ಸೇರೊಂದು ತುಳುನಾಡೊರ್ಮೆ ಎನ್ಮೂರ ಸತ್ಯೋಲಾದ್ ಕೈಟ್ ಬಿರು ಪಗರಿ ಪತೊಂದು ಕಾರ್ಣಿಕ ಪುರುಷೆರ್ ದ್ ಮೆರೆಯೊಂದು ಉಲ್ಲೆರ್🙏🏻
ಬರವು : ನಿತೇಶ್ ಕುಳಾಯಿ
ಸ್ವರ : RJ ಬಿಂದಿಯಾ ಕುಲಾಲ್
#daivaradhane #mugerlu #tulunadu