QABR
Boshimni qo‘yaman, yumshoqdir to‘shak,
Tanamni tark etar yoqimsiz charchoq.
Mehmonchilik tugar, mehmonlar bo‘lsak...
Vatanim lahaddir, chamanim tuproq!
Yillar soati ham o‘tarmish bo‘lsa,
Har kim o‘z joyida qotarmish bo‘lsa,
Shohga ham shu maskan tatirmish bo‘lsa,
Vatanim lahaddir, chamanim tuproq!
Boylik va dunyo deb achisa ko‘ngil,
Gar yo‘qolsa samim kulgular butkul...
Eslatish joizdir, bo‘lsin ming saboq,
Vatanim lahaddir, chamanim tuproq!
Qurib bitirsam ham saroylar zotan
Qolarmi meniki bo‘lib abadiy?!
Ketsak, yetti kunda tugaydi motam,
Vatanim lahaddir, chamanim tuproq!
G‘am bo‘lsa, yaqinim bo‘ladi malham,
Har qanday kunda ham bordir bir odam.
Lekin yo‘q u yerda iymonsiz yordam,
Vatanim lahaddir, chamanim tuproq!
Ulg‘ayib esimni tanibman, bildim.
Bildimki, barchasi shunchaki ro‘yo.
Dunyo - changalzordir, topilmas qo‘nim,
Vatanim lahaddir, chamanim tuproq!
Inson manfaat-la yashar har doim,
Har qanday ish uchun olar nimadir.
Mo‘minga jannatni berar Xudoyim,
Vatanim lahaddir, chamanim tuproq!
Kitob yozsam, kerak bo‘ladi siyoh,
Shifo uchun zarur qandaydir giyoh.
Tavba-la yo‘qolar kabira, gunoh!
Vatanim lahaddir, chamanim tuproq!
Quyosh nuri ila isir sayyora,
To‘rt fasl uzluksiz, davomiy hayot.
Ista sev yoki ket, ammo tobora
Vatanim lahaddir, chamanim tuproq!
Mayli, ol bu dunyo seniki bari,
Lekin bor, unutma, qaytarmoq sharti.
Sakinatda bo‘lmaydi mahzunlik dardi.
Vatanim lahaddir, chamanim tuproq!
Shoshilma, baribir o‘lasan, netay?
O‘sha payt yuraging his qilar tinmay!
Yaxshisi: unutib, ibodat qilay,
Vatanim lahaddir, chamanim tuproq!
Saidamir Abduqahhorov
t.me/saidamirthinks