Өңірлік іссапарым кіндік қаным тамған жер - Қорғалжын ауданынан басталды. Ат басын әуелі Сабынды ауылына бұрдық. Дәстүрден озбай, алдымен ауыл мешітіне соғып құран оқыттық. Жалпы, Сабындыда 1200 жуық халық тұрады. Түтіні түзу шыққан ауыл. Десе де, халықты толғандырған мәселе шаш етектен.Ұлт саулығы - еліміздің тұрақты дамуының кепілі. Сондықтан алдымен ауылдағы дәрігерлік амбулаторияға бардым. Халыққа алғашқы көмек көрсетіліп отырғанмен, терапевт, акушер сынды негізгі мамандар жетіспейді. Дәріхана жағдайы да мәз емес. Сабынды елордадан алыс емес - арақашықтық небәрі 70 км. Бірақ бұл елдімекен интернеті нашар ауылдардың қатарында. Көп ауылға ортақ бұл проблема үйреншікті нәрсеге айналғандай. Тұрғындармен «Әділетті Қазақстан - адал азамат» атты ұлттық құрылтайда айтылған мәселелерді талқылау барысында ауыл халқы жергілікті Мәдениет үйінің жағдайына ерекше тоқталды. Президент өз сөзінде балалар рухани, мәдени тұрғыдан дамуы қажет және мұндай шаруа бүкіл еліміз бойынша тұрақты түрде жүргізілуге тиіс деген тапсырма бергені мәлім. Сабындыда балалардың, жастардың бос уақытын ұйымдастыру үшін Мәдениет үйінің ахуалын ретке келтіру керек. 1974 жылы салынған ғимараттың тозығы жеткен. Бірақ аудан басшылығы бұл мәселе көп ұзамай шешімін табатынына сендірді.Жергілікті халықтың дені мал шаруашылығымен күн көріп отырғандықтан, жайылымды жерлердің мәселесі де өзекті. Ауылдағы 5800 гектар жекеменшікке берілген. Малды асылдандыру мақсатында жұмыс істеп отырған шаруа қожалықтары да бар, бірақ берілетін субсидия аз.Тіршілік нәрі -су мәселесі де өткір тұр. 1970 жылдары салынған трубалар қырық жамау, соның салдарынан айына 2 рет су болмай қалады. Әрине, бұл тұрғындар үшін де, шаруа қожалықтары үшін де үлкен проблема. Сабындының жалпы жағдайы осы. Бірақ қолдау болса және үкімет тарапынан көмек көрсетілсе, бұл ауылдың әлеуеті зор деп есептеймін. Бүгінгі айтылған проблемалардың барлығы сараланып, тиісті органдарға жіберілетін болады.