اهداء لقبائل #رجال_الحجر
من الشاعر عبدالرحمن بن سعد العتيبي ( البيرق)
أرحب أرحب يا هجوسٍ تردّد لك شهر
دقّت الساعة وأنا جيت والماقف كبير
لا تراخىٰ بارد العزم وأقفىٰ واعتذر
يقدم اللي للمواقيف والجزلة سفير
الشعر موروث أهلنا ويحكي عن عمر
يحفظ التاريخ قبل الإذاعة والأثير
من زَمن طرفة بن العبد وزِهير وعَمر
للفرزدق والحُطيئة وحسّان وجرير
في بني الناقة تعلّوا ببيت من الشعر
وبيت ثاني حطّ من شأن فرسان النمير
الشعر فن وأمانة وتاريخ وعبر
الشعر مسرح للإبداع منقطع النظير
القصيد سلاح لازم معه تصبح حذر
مشكلة لاستعمله ظالم وطفلٍ غرير
شاعرٍ ما يقطف الزهر ويزيح الصخر
لو يغوص لغبّة البحر ما يرجع بخير
هاجسي والليل ولّع وخذ مني خبر
ناويٍ لي طرقةٍ تالي الليل الأخير
راكب اللي يطوي البيد ويدنّي السفر
لا مشىٰ في درب كنّ المواتر ما تسير
جيب لكزس لونه أبيض مثل لون القمر
مركب أصحاب المعالي ومركب للوزير
من روابي نجد في قمّة طويق الأغر
حدِّدْ كروكي طريقك وعزّم بالمسير
من وسط داورد حرّك قبل يذّن فجر
بعد ما تربط حزامك تركّد لا تطير
لين توصل دار عزٍ تشادي للبدر
تحفةٍ فيها أولي العقل والمنطق تحير
فوق في روس النوايف مثل حرٍ شهر
معتلي في قمّة المملكة ماله خشير
في جنوب المملكة قبل ترحيب المطر
مرحباً مليون تهطل مثل غيثٍ غزير
في نماص العز دار الفخر بني شهر
وفي بني عمرو المراجل لها فوح العبير
وفي بللحمر مزبن اللي يحس له بقهر
وفي بللسمر فزعة اللي من ظروفه أسير
دار طيب ودار فزعة وجزلات وفخر
دار عز ودار وقفات تبهج بالضمير
فالرخاء غصنٍ من التوت وأنواع الثمر
وأفخم أنواع العسل صافيٍ مثل الغدير
وفالشدايد حربةٍ ما تجنّب في النحر
وخنجرٍ يدمي المعادين والسيف الشطير
للصديق أحلىٰ من الكيف وعذوق التمر
وللأعادي كسر عظمٍ ما يلقىٰ له جبير
وأفتخر في ربعي عتيبة زحول الظفر
سادة الأمجاد مزبن فخر للمستجير
وكان ما شرّفت ربعي مقابيس الخطر
لا يساق الكيف يمّي ولو كنت الأمير
والقبايل قدرها في البلاد أعظم قدر
ما يذمّ أهل الوفاء والكرم غير الحقير
كلنا في ظل دولة لها الرفعة مقر
دولةٍ بالدين قامت علىٰ تقوى وخير
من زمان معزّي اللي ليا منّه أمر
تخضغ الروس العنيدة وما يبغى يصير
دون حدّ بلادنا نرخص الروح ويقرّ
من نواها بالرديّة يبا يلقىٰ المصير
وعاش سلمان الحزم والله يزيده عمر
وسيّدي وليّ عهد البلد جعله بخير
والختام أزكىٰ صلاتي على خير البشر
الرسول الشاهد المنذر النور البشير
‏subscribe + Like
فعل الجرس 🔔
ليصلك كل جديد ✔️
للتواصل والاستفسارات :
الحسابات الرسمية لقناة خالد الاحمري ‏:
‏official WhatsApp:
‏iwtsp.com/966509206359
‏official Snapchat:
‏ / khalid_m57
#لايك
جميع الحقوق محفوظة © على قناة ( خالد الاحمري )