（叔夜下句唱）梅開二度喜氣凝，三注清香酬孔聖，五雲縹緲洛陽城。
（貞侯接唱）宴賜那瓊樓應酩酊。
（董佳接唱）筵開玳瑁玉山傾。
（叔夜接唱）曉來白馬過銀塘。
（素徽食住此了口拈朱墨一方擲落銀塘，欲驚叔夜注意包一才襯水聲介）
（叔夜花半句）誰個投石驚揚將笳鳥醒。（白）哦...想必是花街擲果，綠侶投脂，我們少管也罷。（喝白）打道。
（素徽白）于郎...于郎...
（叔夜白）哦...乜係你呀...
（素徽白）是我...于郎...你可仲認得今日之我否呀？
（叔夜白）認得認得，青樓不比良家，雖係一面之交，亦有難忘印象呀...
（素徽白）于郎...你別來無恙乎？
（叔夜白）勝舊時多矣。
（素徽白）可喜可賀咯。
（叔夜白）倒是可喜可賀咯。（長二王下句）我若非滄海偶曾經，到死難窺風月徑，又怎得宮花斜插伴珠翎，花街擲果，嘩，來頭勁，閃得我玉帶偏斜紫綬傾，馬蹄踏住群芳影，曾證說三生留笑，仲話兩載通靈，原來有債未曾還，忽聽雙鬟傳嬌命。
（素徽白）于郎...我仲以為你得志忘心，乜原來你都仲記得我地西樓有債咩？
（叔夜白）記得記得，記得在於西樓病晤，你為我歌一曲楚江情，因為我別時倉卒，都未付花資，今日相逢，好啦好啦，我奉上黃金一兩，作為度曲之費呀。
（素徽白）多謝了。
（叔夜白）好說...哦...你睇吓景色醉人，幾乎使我忘於禮節添，花魁 既有關懷之意，舊客寧無問好之心呢。素徽素徽，你別來無恙乎？
（素徽白）勝...勝舊時多矣。（長二王下句）巫山除卻有瑤京，蘇杭兩地皆名勝，一樣有翠擁珠圍暖玉屏，我食遍珍饈龍鳳鼎，穿厭了綾羅綢緞，才換上楚布釵荊，若非滄海偶曾經，到死亦難拋花月徑。
（叔夜白）素徽素徽，你剛才向我喜，還差一樣番，你未曾向我道賀番。
（素徽白）那一樣呢？
（叔夜白）冇錯啦，人生最得意者，就係大登科金榜題名，小登科洞房花燭，今日就係我簪花之日，又係我迎娶之期，而家我趕住去迎親呀，若果花魁有餘暇，你莫卻我一杯之請呀。
（素徽白）哦...咁...咁待素徽重賀于相公你奪冠之榮...
（叔夜白）多謝多謝...
（素徽白）再賀于相公你今晚新婚之喜呀...呀...係呢...素徽應該要把玉燕交還，好襯你今晚洞房花燭夜，等你燕將舊物...去慰...慰真情...嗱...
（叔夜白）多謝玉燕還我。
（素徽白）好說了...
（叔夜白）告辭。記得當年清風笑鏡，何以今日相逢佢又笑中帶淚呢 吓？心有懷疑...我都要追查明白...（叫白）素徽...素徽...我叫你呀...（口古）穆素徽...（一才）我都知道你何以不敢回頭，我知道你而家撫心自疚哩，乜你都知道面目無光架咩，你知道良心有愧係嘛，唔怪得話野花即是野花，到底都是邪難勝正呀。
（素徽口古）于叔夜...于叔夜...我都知道野花即是野花，公子即是公子 嘅，但係野花都並無傷人之刺，公子...公子你卻有...卻有碎玉之刑呀...
（叔夜花下句）難憑血跡明真偽，且從淚影泛心聲，當日你空書回絕呢個痴心人，我險把殘生殉夢境。（琵琶譜子）
（素徽哭白）哎吔...我幾曾以空書絕你呢？
（叔夜白）素徽...書函之內還有香雲一縷係嘛？
（素徽白）係。
（叔夜白）哦...何以信中有箋，箋中又無字呀？
（素徽愕然白）哎吔...我還記得...我上寫辱愛妾穆素徽，襝衽泣拜於于叔夜夫君足 吓，仲有傷心字共寫三行，何得謂之無字？
（叔夜白）哎吔...素徽...看來其中必有緣固呀...咁你信內點樣寫法呀？
（素徽白）個封信呀...（小曲掃落花二段唱）我舟次乞再會，離恨得盡傾。
（叔夜序白）記得西樓一別，你都冇遠行之意架？
（素徽續唱）你父憎我恨我，驅我依荒嶺，空舟一晚暴雨未饒妾命，媽媽將我賣與池同，埋陷阱，賺我假稱姑母病，一心欺騙我入門，迫我納小星。
（叔夜接唱）虎搏兔，怎抗命。（白）吓？
（素徽序白）我誓死都不從囉。
（叔夜白）素徽（接唱）與魔君怎拼呢？
（素徽序白）猶幸得有一位奇人相救呀。
（叔夜續唱）嘆侯門若鐵城，花遭劫得遇救，不以壞了名，向蒼天叩謝再擁卿，你不貪新貴，盡忠盡愛真堪敬。（序白）素徽素徽...我真係幾回負你咯，你話得奇人相救，咁後來又點樣呀？ 吓？
（素徽序白）用計賺池同設壇超渡，我萬不料...（催快唱掃落花三段）蒼蒼白髮佢落禪徑，偷窺復偷聽，辦邪正，英風蓋世可驚，佢為我暗用堂上妾，換柱代樑，越覺堪敬，得以延妾命，得以復妾名。
（長公卸上介）
（叔夜擁素徽哭介口古）素徽，我不知道誰人弄計，看來我嚴親太心狠矣，素徽，我今生若不與你為妻，我寧把浮名付諸權命。
（素徽口古）于郎，所謂未經滄海都不知滄海之深，未上巫山不知巫山之渺，得明妾心，死且無怨咯，何敢望花能復艷，月可重明。
（叔夜白）素徽，我非輕諾之人，我事必要共你...
（長公上白）咳咳...
（素徽白）豪客...
（叔夜白）連伯...
（素徽白）就是他...
（叔夜白）哦...就是他...
（長公白）慢來慢來...（快木魚）山雨欲來則雲未定，叔夜，你休憑口上說堅貞，池同...池同未肯饒他命，向父哀哀訴薄情，聞得相爺頒下將軍令，御史門前暗伏兵，問罪興師佢 嘅風頭勁，佢話決憑權勢取傾城。
（叔夜驚白）哎吔...
（長公白）打醒主意...
（文豹上介口古）相公相公，堂上鳳燭高燃，堂下張燈結綵，花轎都將近臨門，老爺盼望兒歸，命我搜索長安，三催三請。
（叔夜驚白）哎吔...
（素徽口古）于郎...你歸去罷...歸去罷...妾所求君祗是一點心，我不願郎你腮雙掛淚，從今都莫問風前草，歸巢鸞鳳早和鳴。
（叔夜白）素徽...（快花下句）忘恩負義生何用，若到殉情死尚輕，三台權勢都未饒人，三尺桐棺難合併。（白）素徽...我更不能新鮮寡志，我寧願抱石投江咯...
（長公白）真架...哈哈哈...（花下句）手執于郎狂聲笑，能同生死見真情，我與你歸家再與虎狼爭，留回抱石投江命。