Xorazm milliy bosh kiyimi sanalgan cho‘girma haqida eshitgan yoki uni bir marta bo‘lsa-da, kiyib ko‘rganlar oramizda talaygina. Ammo uning nimadan va qanday tayyorlanishi ko‘pchilikka qorong‘i. Xivalik Shokir Abdullayev cho‘girmachi-po‘stindo‘z hunarmand sulolasining yettinchi avlodi vakili hisoblanadi. Uning Ichan qal’a davlat muzey-qo‘riqxonasi hududida joylashgan mo‘jazgina savdo do‘koni hamisha gavjum, sayyohlarning qadami arimaydi. “Daryo” muxbiri qadimiy Xivaga qilgan safari chog‘ida Shokir Abdullayev bilan suhbatlashdi.