Бейбіт заманда тапа-тал түстегі жарылыс, баспаналардағы өрт, күтпеген адам шығыны онсыз да кедейліктен көз аша алмай келе жатқан Қазақстандықтардың зәресін алып бітті. Петропавлда бес қабатты жатақханадағы жойқын жарылыстан екі адам қаза тапты. 13 адам түрлі деңгейдегі дене жарақаттарымен ауруханаға жеткізілген. Қазір үш адам ауыр жағдайда жансақтау бөлімінде жатыр. Мамандардың сөзінше, жатақхананың бірінші қабатындағы дәмханалардың бірінде газ баллоны жарылған. Қазір төтенше оқиғаға қатысты қылмыстық іс қозғалды.
Екі адамның өмірін қиған жойқын жарылыс жатақхананың бірінші қабатындағы дәмханалардың бірінде болған. 27 литрлік газ баллоны жарылып, дәмхананы жалға алған 25 жастағы жігіт аурухананың жансақтау бөлімінде көз жұмды. Үш сағаттан кейін үйінділердің арасынан 21 жастағы қыздың денесі табылды. Ал ғимараттың жоғарғы қабатындағы тұрғындар жарылыс болған тұрғын үйден әрең шыққандарын, кейбірі тіпті, үстіндегі киімдерімен терезеден секіріп қашқандарын айтады.
ВАДИМ ШЕВЕЛЕВ, тұрғын:
- Мен және басқа да жігіттер тұрғындарды жатақханадан шығара бастадық. Қарттарға көмектестік. Сол кезде бірінен соң бірі құтқарыңдар деп айқайлай бастады.
Жатақханадан 120 адам жақын маңдағы мектепке жеткізіліп, баспанасыз қалғандарға университет жатақханасынан орын берілген. Он үш адам түрлі деңгейдегі күйік жарақатымен ауруханаға жеткізілген. Оның үшеуі ауыр халде жатыр дейді дәрігерлер. Тұрғындардың сөзінше, жатақхана орталық газға қосылмағандықтан тұрғындар да, дәмхана иелері де газ баллон қолданып келген екен.
ГҮЛНӘР ДИЛОВА, тұрғын:
- Тоқсаныншы жылдардан бері газ баллондарды пайдалануға рұқсат берді бізге. Әрине, тек сөз жүзінде. Өйткені электр плиталарды қолданған кезде үнемі жарық өшіп қалатын.
ЛАРИСА БОЗИНА, тұрғын:
- Дәмханалар өртке қарсы ережелерді сақтамайтын. Қанша рет полицияға, прокуратураға арыздандық. Бәрі бір-біріне сілтеп, жауапкершілікті өздерінен итеретін.
Төтенше жағдайлар департаментінің басшылығы бұған қатысты тұрғындардан шағым түспегенін, соңғы рет 6 жыл бұрын ғана тексергендерін айтты. Ал екі адамның өмірін қиған жатақханадағы жарылысқа қатысты қылмыстық іс қозғалды.
ҚҰМАР АҚСАҚАЛОВ, СҚО әкімі:
- Бірінші этаждағы кафелерде, басқа да объектілерде газ баллондарын пайдалануға болмайды.
- Олар сонда заң бұзып тұр ма?
- Солай болып тұр. Қазір тексеріс жұмыстары жүреді. Сонда анықтаймыз.
Облыс әкімінің сөзінше, жарылыс болған жатақхана иелеріне жүз айлық есептік көрсеткіш мөлшерінде бір реттік қаржылай көмек төленеді. Ал зардап шеккендерге баспана берілмейтінін, тек жатақханаға жөндеу жүргізілетінін айтты.
Руслан Жасұланұлы, Қуаныш Әлтенов
Бізді әлеуметтік желіде оқыңыздар:
KZread - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Петропавл #жарылыс