Toshkentdagi «Bunyodkor» stadionida 14 mingdan ortiq tomoshabin qarshisida o‘tgan uchrashuvning 54-daqiqasida bosh hakam Aziz Asimov VAR’ni tekshirib, qarshiliklar darvozasi tomon penalti belgiladi. 11 metrlik nuqtaga yaqinlashgan Dragan Cheran hisobni ochdi - 1:0.
Ikkinchi bo‘limning 74-daqiqasida Ro‘ziqul Berdiyev ketma-ket uchta o‘zgarishni amalga oshirib, jamoasining hujumkorligini oshirdi. Natijada, 80-daqiqada Murod Rahmatovning uzatmasidan so‘ng Sharof Muhitdinov jarima maydoni tashqarisidan yo‘llagan kuchli zarbasi bilan hisobni tenglashtirdi - 1:1.
Uchrashuvning asosiy vaqti 100 daqiqadan ham ortiq davom etgan bo‘lsa-da, kuchlar teng kelib, jamoalar penaltilar seriyasiga taklif etildi. Lotereyada esa omad «Nasaf»ga kulib boqdi. Jamoalarning dastlabki zarbalarini ijro etgan gol mualliflari Muhitdinov va Cheranning zarbasini darvozabonlar qaytarib qolishdi. Nasrullayev va Xolmatov ham zarbadan foydalana olishmadi. Qarshiliklar darvozaboni Abduvohid Ne’matov 3ta zarbani qaytarib, jamoasiga g‘alabani keltirdi.
Shu tariqa, «Nasaf» o‘z tarixida 3-marta O‘zbekiston Superkubogiga ega chiqib, bu borada ham peshqadamga aylandi.
#sports
#futbol