بسم الله الرحمن الرحيم
Аса қамқор, Ерекше мейірімді Алланың атымен бастаймын!
Жұбайлары.
Пайғамбарымыз (с.а.с.) дүние тіршілігінде нәпсінің қалауымен не дүниелік мақсатпен емес, бір Алланың әмірімен ардақты әйелдерге үйленді.
1. Бибі Хадиша бинт Хуайлид. Пайғамбар (с.а.с.) оған 25 жасында үйленді. Бибі Хадишаның жасы 40-та еді. Ол һижрадан 3 жыл бұрын қайтыс болды. Пайғамбар (с.а.с.) Хадишаның тірі кезінде басқа ешкімге үйленбеді.
2. Бибі Сауда бинт Зумға. Пайғамбар (с.а.с) онымен алғаш уахи келгеннен кейінгі 10-ыншы жылы отасты. Бибі Сәуданың күйеуі Эфиопия жерінде қайтыс болған-ды. Сосын ол Меккеге қайтты. Пайғамбар (с.а.с.) оны мүшрік туыстарының қыспаққа алуынан қауіп қылып үйленді. Бибі Сәуда Омар ибн Хаттабтың халифалығы тұсында қайтыс болды.
3. Бибі Айша бинт Әбубәкір Сыддық. Пайғамбар ( с.а.с.) Айша анамызға һижраның 1-інші жылы үйленді. Әбубәкір Пайғамбардың (с.а.с.) өзінің қызына үйленіп, арадағы байланысты одан әрі нығаюын қатты қалайтын. Бибі Айша - Пайғамбардың (с.а.с.) жұбайларының ең жасы әрі қыздай алған жалғыз әйелі. Айша анамыз һижраның 58 жылы рамазан айының 17-сінде қайтыс болды.
4. Бибі Хафса бинт Омар ибн Хаттаб. Бибі Хафсаның күйеуі Бәдір соғысында алған жарақаттан соң қайтыс болады. Әкесі Омар сахабаларға жесір қалған қызына үйленуді ұсынады, алайда олар бас тартады. Пайғамбар (с.а.с.) сахабасы Омарға құрмет ретінде Хафсаға үйленеді. Хафса анамыз һижраның 45 жылы шағбан айында қайтыс болады.
5. Бибі Зейнеп бинт Хузайма ( Міскіндердің анасы). Күйеуі Бәдір шайқасында шәһид болған Зейнеп жесір қалады. Пайғамбар (с.а.с.) Зейнепке һижраның 3-інші жылы үйленеді. Бибі Зейнеп һижраның 4-інші жылы қайтыс болады.
6. Бибі Жуәйрия бинт әл-Харис ибн Әбу Даррар әл-Хузағия. Бәни Мусталиқ жорығында мұсылмандардың қолына тұтқын болып түскен. Бибі Жуәйрия сол тайпаның көсемінің қызы болатын. Пайғамбар (с.а.с.) оның текті жерден шыққандығын ескеріп, тұтқыннан босатып, үйленеді. Бұл һижраның 6-ыншы жылы еді. Бибі Жуәйрияның Пайғамбарға (с.а.с.) тұрмысқа шығуымен оның қауымы түгелдей тұтқыннан босатылады.
7. Бибі Зейнеп бинт Жахыш. Пайғамбар (с.а.с.) Зейнеп анамызға һижраның 4-інші жылы зул-қағда айында үйленді. Зейнеп бинт Жахыш - Пайғамбардың (с.а.с.) бір апайының қызы. Ол алғашқыда Алланың әмірімен Зәйд ибн Харисаға, сосын Пайғамбарға (с.а.с.) тұрмысқа шықты. Зәйд Алланың елшісінің (с.а.с.) қызметкері әрі асыранды ұлы еді. Алла Тағала асыранды баланың бел баладай болмайтындығын мұсылмандарға тәжірибе түрінде түсіндіру үшін Зейнепті әуелі Зәйдке қосып, сосын Пайғамбарға (с.а.с) отастырды. Бибі Зейнеп бинт Жахыш һижраның 20 жылы қайтыс болды.
8. Бибі Умму Сәләмә. Шын аты Һинд бинт Әбу Умәйя әл-Махзуми, күйеуінің аты Әбу Сәләмә, Ухуд соғысында шәһид болған алғашқы мүһәжір. Пайғамбар ( с.а.с.) күйеуіне құрмет ретінде Умму Сәләмәға һижраның 4-інші жылы шәууәл айында үйленді. Бибі Умму Сәләмә 62 жылы қайтыс болды.
9. Бибі Сафия бинт Хуяй ибн Ахтаб. Бәни Надыр атты еврей тайпасының көсемінің қызы. Шайқастан кейін мұсылмандардың қолына түскен Сафияны Пайғамбар (с.а.с.) тұтқыннан босатып, үйленеді. Бибі Сафия Ислам дінін өз еркімен қабыл алады. Онымен бірге көптеген туыстары да дінге өтеді. Бұл оқиға һижраның 7-інші жылы болған. Бибі Сафия
һижраның 52 жылы дүниеден өткен.
10. Бибі Умму Хабиба Рамла бинт Әбу Суфиян. Бибі Рамла бұрын Абдулла ибн Жахышқа тұрмысқа шыққан. Алла жолында Эфиопияға көшкен кезде күйеуі Абдулла Ислам дінінен шығып, христиан дініне өтіп кетеді. Ал жұбайы Рамла дініне берік болатын. Бұл
хабар өзіне жеткен соң Пайғамбар (с.а.с.) Эфиопия патшасы Нажжашиге хат жазып, елден жырақ жалғыз қалған Рамланы өзіне айттырады. Бибі Рамла Мәдинаға һижраның 7-інші жылы келіп, күйеуі Пайғамбармен (с.а.с.) қосылады. Һижраның 40 жылы дүние салады.
11. Бибі Мәймуна бинт әл-Харис әл-Һиләлия.
Пайғамбар (с.а.с.) Мәймунаға һижраның 7-інші жылы, қаза ұмрасын өтеуге бара жатқан жолда оның қауымының иман келтіруі үшін үйленеді. Сонда Мәймунаның көптеген туыстары иман келтіреді. Бибі Мәймуна һижраның 51 жылы қайтыс болған.