Bujar Sefa është i riu i cili rezulton në skedën e të humburve prej 17 vitesh.
Ai jetonte me familjen në Xhavzotaj të Durrësit, ndërsa u tha prindërve se do të largohej tek të afërmit e tij në Tiranë, aty ku edhe u zhduk, në orët e vona të natës. Familjarët mësuan se i riu kishte mbërritur në kryeqytet, por ishte larguar, pas marrjes së një telefonate nga një person i panjohur.
Bujar Sefa u arratis pak ditë përpara finalizimit nga policia të operacionit ’Rexhina’ në maj të vitit 2007. Me gjithë përpjekjet e panumërta, familja Sefa nuk ka mundur të zbulojë gjurmët, por kanë mësuar atë që fshihej pas. 38-vjeçari u dënua në mungesë nga Gjykata e Shkallës së Parë për Krimet e Rënda, me 15 vite burg, si pjesë e një grupi të strukturuar kriminal, me akuzën e vjedhjes me armë, trafik i mjeteve motorike në formën e një grupi të struktuar kriminal. Gjashtë ishte numri i të pandehurve, nga Prokuroria që i dha fund hetimeve, në vitin 2007, mes tyre edhe Bujar Sefa, person ende në kërkim nga policia.
Sipas babait të 38-vjeçarit, edhe një tjetër bashkëpunëtor i tij, Bledar Hasani, gjithashtu i dënuar në mungesë jeton në arrati por ka kontakte me familjen.
Pasi humbën nga kjo jetë vajzën 17-vjecare nga një sëmundje e rëndë, dy prindërit humbën edhe djalin, për të cilin kërkojnë ndihmë në emisionin ’Pa Gjurmë’. Shpresat se i biri është gjallë, për Zaimin janë të pakta, ndaj ai bën thirrje të zbardhet e vërteta.