بەهرۆز فەرەیدوون، پێشکەشکاری بەرنامەکە بنکۆڵی سوڵحی عەشایەری و پاڵنەر و هۆکار و گرفتەکان دەکات، وێنەگرتنی بەرنامەکە لە شاری هەولێر و قەزای خەبات -ی سەر بەو شارەیە کە وەک دەگوترێت زۆرترین کێشەی کۆمەڵایەتی و کوشتن و تەقەکردن و سوڵحی عەشایەریی هەر لەو قەزایەیە.
لەناوەرۆکی بەرنامەکەدا دەردەکەوێت کەسایەتییەکی دیاریی عەشیرەتی “هەرکی” دووژمندارە و پێشکەشکاری بەرنامەکە چاوپێکەوتنی لەگەڵ ئەنجام دەدات، کەسایەتییەکەی عەشرەتی هەرکی داوا دەکات یاسا بکـ.ـوژەکە لەسێدارە بدات ئەگەرنا خۆیان دەیانەوێت دووژمنەکەیان بکـ.ـوژن، پارێزەر و بەڕێوەبەرێکی گشتیی لە دەستەی مافی مرۆڤ -ی هەرێمی کوردستان دانی پێدا دەنێن کە بەشێک لە دادوەرەکانیش داوای رێککەوتن و سوڵحی عەشایەریی لە لایەنەکان دەکەن، هاوکات چەندین چیرۆکی ورد و سەرنجڕاکێش لەبارەی قوربانیی و تۆمەتباران و تاوانباران لەناوەرۆکی بەرنامەکەدا باسدەکرێت.