Assalomu alaykum hurmatli yurtdoshlar bugungi brifingimizda Guliston tumani Oila va xotin-qizlar bo‘limi tomonidan Oilaviy ajrimlar hamda ayollar o‘rtasida jinoyatchilikni oldini olish borasida tumanda amalga oshirilgan muhim vazifalar to‘g‘risida ma’lumot berib o‘taman.
Mamlakatimizda xotin-qizlarni har tomonlama qo‘llab-quvvatlash va aholi o‘rtasida sog‘lom turmush tarzini qaror toptirish, yuqori iqtisodiy o‘sishga erishish hisobidan xalqimizning farovonligini oshirish va kundalik hayotidagi muammolarni hal etish bo‘yicha bir qator ishlar amalga oshirilmoqda.
O‘zbekiston Respublikasi Prezidentining 2022 yil 7-martdagi 87-sonli farmonlari ijrosini ta’minlash maqsadida Guliston tumani Oila va xotin-qizlar bo‘limi va 26 ta mahallalardagi xotin-qizlar faollari tomonidan rejaga muvofiq tadbirlar amalga oshirilmoqda.
Bugungi kunda Guliston tumanida 2024 yil 1 chorak yakunida oilaviy ajrimlar soni 21 tani tashkil etmoqda, 2023 yilda xam bu ko‘rsatgich 21 tani tashkil etgan. Ajrimlarni tahlil qiladigan bo‘lsak, sud tomonidan 13 ta oila, FXDYO tomonidan 8 ta oila ajrim qilingan. Shundan 4 tasi 30 yoshgacha bo‘lgan yosh oilalar hisoblanadi. Oilaviy majorolar va sudlarga chiqqan ajrimlar bo‘yicha ish olib borilganda, oilalarda doimiy janjallar, ishonchning yo‘qligi, farzandsizlik, oilada erning yoki ayolning ish bilan ta’minlanmaganligi, er yoki ayolda surunkali kasalliklarning mavjudligi, er yoki ayolga nisbatan hurmatsizlik hamda er yoki ayolning chet davlatga ishlashga ketganligi sababli o‘rtada aloqaning uzilganligi kabilarni asosiy sabab sifatida keltirib o‘tishimiz mumkin.
Tumandagi barcha mahallalarda oilalar bilan manzilli ishlash, oilaviy ajrimlarning oldini olish va muammoli oilalarimiz bilan mahallalarda tuzilgan “Oilaviy qadriyatlarni mustahkamlash” komissiyalari bilan hamkorlikda 30 ta ajrim yoqasidagi oilalar bilan tushuntirish va targ‘ibot ishlari olib borilmoqda. Buning natijasida 28 ta oilalar yarashtirilishiga erishildi.
Hurmatli brifing ishtirokchilari!
“Farovon oila kelajak poydevori” shiori ostida oilalarni mustahkamlash borasida 15 marta targ‘ibot tadbirlari o‘tkazilgan. Bu tadbirlarda 230 dan oshiq qatnashchilar ishtirok etgan. “O‘zbek qadriyatlari urf-odatlari buvijonlar talqinida” shiori ostida mahallalarda oqila ayollar harakati a’zolari va buvijonlarimiz ishtirokida o‘zbek milliy qadriyatlari bo‘lgan urf odatlarimizni yoshlarga yetkazib berish va ularda milliylikni shakllantirish maqsadida 3 oy mobaynida 15 dan ortiq tadbirlar tashkil etildi.
2024-yilning 1-choragida tazyiq va zo‘ravonlikdan jabr ko‘rgan 80 nafar xotin-qizlarga himoya orderi berilgan bo‘lsa, bu ko‘rsatgich o‘tgan yilning mos davriga nisbatan 9 nafarga ortgan. Jamiyatda xotin-qizlarga tazyiq va zo‘ravonlikka nisbatan murosasizlik muhitini yaratish, xotin-qizlarning huquqiy va qonuniy manfaatlarini ta’minlash maqsadida Oila va xotin-qizlar bo‘limi tomonidan tazyiq va zo‘ravonlikdan jabr ko‘rgan, profilaktik hisobda turgan psixologik va huquqiy ko‘makka muhtoj xotin-qizlar bilan individual ishlar olib borilmoqda.
Shuningdek, qo‘shimcha qilib aytadigan bo‘lsam 2024 yil 1 chorak yakuniga ko‘ra xotin-qizlar tomonidan sodir etilgan jinoyatlar soni 3 tani tashkil etmoqda, mahallalarda huquqbuzarliklarni oldini olish va jinoyat sodir etishga moyilligi bo‘lgan xotin-qizlar bilan ichki ishlar bo‘limi bilan hamkorlikda doimiy tarzda tushuntirish va targ‘ibot ishlari olib borilmoqda.
E’tiborlaringiz uchun rahmat.