t.me/Angla2022kurs
Aminmanki, hammamiz bir bor bo`lsa-da, atrofdagilardan «Xudbin bo`lma» degan tanbehni eshitganmiz. Aslida, o`shalarning o`zi xudbin, bizni shu yo`l bilan boshqarishmoqchi: «Yo`q, xudbin emasman, siz uchun har narsaga tayyorman», deb harakat qilishimizni kutishayapti. To`xtang! Bu aldovga chuv tushmang. Xudbin bo`lmaslik bu o`zni sevmaslik degani emas.
Hammaga birdek yoqishga intilsangiz…
Atrofdagilardan o`zingizga nisbatan maqtov, olqish eshitishga muhtojsiz. Sizni yoqtirmay qo`ysalar, hay-hay, bundan yomoni bormi? Bu o`zini yaxshi ko`rmaydigan odamning xulqidir. Chunki tashqaridan aytilgan maqtovlar insonning o`ziga bo`lgan ishonchini sug`orib turadi. «Men»ini sevgan va «men»iga etarlicha ishongan odam bunga muhtoj emas, unga o`zining muhabbati, maqtovlari etib-ortadi. Ya`ni atrofdagilarning muhabbati xuddi telefonga zaryadka orqali o`tayotgan tokdek gap. Tokka to`la batareykani zaryadlashga ehtiyoj yo`q. O`zingizni o`ylang, o`z tuyg`ularingiz bilan qiziqing, o`zingiz bilan ovora bo`ling. Shunda boshqalarning muhabbatiyu maqtovlariga zor bo`lib qolmaysiz. Shu maqtovlarga erishish uchun o`lib-tirilmaysiz.
Boshqalar uchun yashasangiz…
Hayotdan lazzatlanib, o`zingiz uchun yashamaysiz. O`zingizni alllaqachon unutib qo`ygansiz. Ishxonada hamma vazifani gardaningizga olasiz, bir-ikki marta rahmat eshitarsiz, ana boring, muokofot puli ham berishar. Ammo bir kun bu mas`uliyatdan charchaysiz, boshqalar soyangizda maza qilib yurishgani etmagandek, muammo chiqqanda sizga yuklab qo`ya qolishadi. Axir hech kimga muammo kerak emas, demak, fidoyilikning ham me`yorini biling, toki o`zingizga ham yaxshi bo`lsin, boshqalarga ham.
Ko`p xafa bo`lsangiz…
Xafalik kimdir umidlarimizni oqlamasa, biz istagan narsani qilmasa, aytmasa, bermasa, yuzaga keladigan holatdir. Lekin odamlardan ular berishni istamagan narsani umid qilish noto`g`ridir. O`zini yaxshi ko`rgan odam kimdandir nimadir ilinjida yashamaydi: yo so`rab oladi yoki ishlab. Shunday ekan, «qilmadi, aytmadi...» deb xafa ham bo`lmaydi. Olaylik, tug`ilgan kuningiz yoki bayram yaqinlashayapti. Siz yangi rusumdagi telefon yoki ko`ylak haqida orzu qilayapsiz. Eringizning oldida bunga sha`ma ham qildingiz va u sha`mangizni to`g`ri tushundi deb, endi «kutilmagan» sovg`ani kutayapsiz. Eringiz esa yo sha`mangizni tushunmagan, yo unutgan: yana o`sha uchta chinnigul bilan kirib keladi. Siz esa xafa bo`lasiz. Eringiz begona emas-ku, «Dadasi, imkoningiz bo`lsa, tug`ilgan kunimga manavi narsani sovg`a qilsangiz, juda baxtiyor bo`lardim» deganingizda, olam guliston edi. O`zini yaxshi ko`rgan ayol shunday qiladi.
Muhabbatda omadingiz chopmasa…
O`zini yaxshi ko`rgan ayolni eri, qizni yigiti tashlab ketmaydi. O`zini sevgan insondan faqat muhabbat ifori taraladi, yonidagi inson shu iforga mast bo`ladi, undan uzoqlashgisi kelmaydi. O`zini yaxshi ko`rgan ayol xotirjam, quvnoq, o`zini parvarishlagan bo`ladi. O`zini yaxshi ko`rgan ayol baxtli bo`ladi, baxtlilarni esa tashlab ketishmaydi, aksincha, ularga intilishadi. Chunki baxt yuqumlidir.
Hasad qilsangiz…
Menda yo`g`-u, unda bor - mana shu tuyg`u hasad bo`ladi. Xuddi shu narsaga egalik qila olmayotganingizdan siqilasiz, o`zingizni shu narsaga loyiq emas, deb hisoblaysiz. Bu esa o`zingizni yaxshi ko`rmaganingizdandir, boshqa sabab bo`lishi mumkin emas. O`zini sevgan odam birovlarga qaramaydi, ularda bor narsalarning o`zida yo`qligidan o`kinmaydi, u boshqalarda emas, o`zida bor narsalarni ko`radi, o`shalar uchun shukr qiladi va yashashda davom etadi.
#sevgi #sevishganlarsuhbati #motivation