#naxcivan #ordubad #kend
Azərbaycanda möcüzəvi kənd.
İnsan fiquruna bənzəyən qayanın yerləşdiyi sirli yer.
Yerin Qulağı yutub kanalı Zəngəzur silsiləsinin ətəyində yerləşən, qışı sərt keçən, möcüzəvi təbiəti ilə göz oxşayan Unus kəndi ilə bağlı mühüm məlumatları təqdim edir:
Əsrarəngiz təbiəti ilə seçilən Naxçıvana səfərimiz davam edir. Əshabi Kəhf, Batabat gölü - indi isə səfərimiz Ordubad rayonunun qeyri-adi təbiəti ilə seçilən Unus kəndinədir.
Ordubad yerləşdiyi ərazi etibarilə hər daim fərqlənir - deyə çox eşitmişdim. Ancaq elə mənzərə ilə qarşılaşdım ki...
Min dəfə eşitməkdənsə, bir dəfə görmək daha yaxşıdır - gözəl deyib atalarımız.
Bura deyilənlərdən də çox fərqli yer imiş. Xüsusən də Unus kəndi...
Səfərimiz zamanı ordubadlıların necə qonaqpərvər olduqlarının bir daha şahidi olduq.
Gözəl Naxçıvanın görməli yerlərini göstərən, tanıdan, bələdçilik edən Rüstəm Mirzəyev bizi evində qonaq etdi.
Evin ağsaqqalı Həsən Mirzəyev bizi qarşıladı. Həsən baba ilə uzun-uzun söhbətləşdik. Həsən baba kəndin tarixi, adət-ənənələri, ümumi olaraq Naxçıvanla bağlı danışdı. Xatirələrini bölüşdü.
Daha sonra kəndi gəzməyə başladıq. Kənd haqda ətraflı məlumatlar öyrəndik.
Unus kəndinin yolu yeni çəkilib.
Kənd rayonun mərkəzindən 33 km şimal-qərbdə, Zəngəzur silsiləsinin ətəyində yerləşir. Orta məktəbi, klubu, kitabxanası, tibb məntəqəsi var.
Yaşayış məntəqəsi deyilənə görə, keçmişdə Piçənis kəndindən (Laçın rayonunda kənd) çıxmış bir qrup ailənin “Unusalı” adlı yerdə məskunlaşması nəticəsində yaranıb.
Ərazi Azərbaycanda ən böyük şəlalələrdən biri sayılan Pəzməri, Qaplançay, Çimənək şəlalələri, dəniz səviyyəsindən 2000-2500 metr yüksəklikdə yerləşən Xəlilyurdu, Ağyurd, Alçalıq, Cərbas yaylaqları ilə turizmin məkanıdır.
Əhalisi türk dilində danışan kiçik yaşayış məntəqəsi olub. Tədqiqatçılara görə unus türk dillərindəki əniz/eniz (çuxur yer, tarla,əkin yeri, örüş, boş çöl ) sözünün təhrif olunmuş şəklidir.
Unusun qışı sərt keçir. Şəhər mərkəzinə təqribən 20 dəqiqəyə çatmaq olur.
Əhalisi 786 nəfərdir. Əhalisi Meyvəçilik, əkinçilik və heyvandarlıqla məşğuldur.
Kəndin əlverişli iqlimi, zəngin bitki örtüyü arıçılığın inkişafı üçün çox əlverişlidir. Ona görə də bir çox evlərdə arı yeşiklərinə rast gəlmək mümkündür.
Unusda həyətində limon ağacları olmayan az adam tapılar. Bilirsiniz ki, Ordubad limonu görünüşü, rəngi, dadı-tamı və xoş ətri ilə seçilir. Havanın, suyun saf və təmiz, torpağın isə faydalı elementlərlə zənginliyi limonu da qiymətli edib.
Kənd istər dağ, istərsə də yaşıl turizm həvəskarları üçün olduqca əlverişli məkandır. Təbiət abidələri ilə zəngin olan bu kənd yay mövsümü üçün Naxçıvanın ən gözəl istirahət yerlərindən hesab edilir.
Bağlarında gilas, cəviz, tut ağacları geniş yayılıb.
Dağlarında nanə, kəklikotu, yemişan, baldırğan, çaşır, sumaq, yarpız bitir.
Vənəndçayın üzərində yerləşən bu kənd bir sözlə çox möhtəşəmdir.
Daha sonra yola düşdük kəndin Gəlin Qayası deyilən hissəsinə...
Yol boyu bizi qarşılayan qayalıqlar öz əzəməti ilə hər kəsi qoyurdu...
Gəlinqayaya çatmamış, kəndin yuxarı hissəsində insanların ziyarət etdiyi pir də yerləşir.
Həmin yerlə də tanış olduq.
Türk dünyasının bir çox ərazilərində mövcud olan Gəlinqayalara ekzotik təbiət abidələri ilə diqqətçəkən Ordubadda da rast gəlirik. Rayonun Unus və Pəzməri kəndləri arasında yerləşən Gəlinqaya insan fiquruna bənzəyir. Onu da deyək ki, Gəlinqaya abidəsi Şahbuz və Şərur rayonlarının ərazisində də var.
Tarixən dağları, qayaları əfsanələşdirən xalqımız bu Gəlinqayanı da əfsanələşdirib. Həmin əfsanələrdə qadın ləyaqəti, qadın isməti xüsusi yer tutur. Həm folklorumuzu öyrənmək, həm də mənəviyyat baxımından əhəmiyyətli olan gəlin-qaya, qız-daş, qız-gəlin və sair bu kimi təbiət abidələrinin mərkəzində qədim türklərə məxsus daş kultu dayanır.