نالہ ابلیس
ابلیس اوچے اللّٰهو مکالمہ
عمر حیات راسخ
===========
ابلیس
فائدو چے ہوئے خسارو سودا سربسر ہاسے کیاغ
یادا؟ ارزوان ارو تو حشر نشر ہاسے کیاغ
تان اطاعتو رہان تو ہَش پیچ و خَم کو ارو؟
مہ کشمکشہ پیچھی پیدا تو آدم کو ارو؟
ہیرا کیہ راز لاکھی شیر؟ ہتو محترم کو ارو؟
ہاسے دی گُومو اویوئے تؤو سورا کَرَم کو ارو؟
اچی ارو تو ہاتو وا دی معتبر ہاسے کیاغ
یادا؟ارزوان ارو تو حشر نشر ہاسے کیاغ
اللہ
تو دی بیسو محترم مہ حکمو تعمیل بیروا
یعنی ابلیس نو بیتی مدام عزازیل بیروا
تو نو بیتی تہ ژاغہ آدمو تشکیل بیروا
ہاتو دی ہَش کوریسام مہ حکم ثقیل بیروا
گُؤمو ژیبیکا اوشویے تہ فتنو شَرَر ہاسے کیاغ
رے اسوم کا دی نکی مہ غون با خبر ہاسے کیاغ
ابلیس
تہ بندگان ارینی تہ دینو تباہ، لوڑیکی
وا دی ہاتیتان ویشکی تہ رحمو نِگاہ، لوڑیکی
مہ ای سجدو سورا تان راندَءِ درگاہ، لوڑیکی
مسوم مہ نفس اسیتایے ہیس مہ کیا گناہ، لوڑیکی
مہ کیہ سجدارخالی نو پورا بحر و بر ہاسے کیاغ
یادا؟ ارزوان ارو تو حشر نشر ہاسے کیاغ
اللہ
مہ لؤو کار نو کوری نفسو لؤو کار کو ارو؟
تو معافیو ژاغہ بحث اوچے تکرار کو ارو؟
مسار مہلت مشکی تو میعادو درونگار کو ارو؟
تو قیامتہ پتی انوسان اِشمار کو ارو؟
اوا اَنگار اوا لوٹ ریتاو ہیس بَشَر ہاسے کیاغ
رے اسوم کا دی نکی مہ غون باخبر ہاسے کیاغ
ابلیس
ای آزمایشہ ارو غیژی مہ ہَدَف کھیو بچین؟
دیتی مقام تو متین ارو وا حَذَف کھیو بچین؟
عرشاری فرشہ پیسی ارو مہ اِسرَف کھیو بچین؟
دونی بہچیتام آدم ہارونی اَشرَف کھیو بچین؟
اوا گناؤ اوشوتام تہ نامو اَزبر ہاسے کیاغ
یادا؟ ارزوان ارو تو حشر نشر ہاسے کیاغ
اللہ
تہ امتحانو بچین حالاتان ناساز اریتام
اوا سجدہ کورے رے کندوری ہواز اریتام
تاتین مقام دی پھیتام وا تہ سورا ناز اریتام
فرشتگنانتے تہ عرشہ دی استاز اریتام
تہ دی کوری اسیتام عزتو پیکر ہاسے کیاغ
رے اسوم کا دی نکی مہ غون باخبر ہاسے کیاغ
ابلیس
تہ ہے بندہ مشکیکو ہوتے تو بخشش کوریتاؤ
ریتاؤ معاف اریتام معمولی لغزش کوریتاؤ
جنت، جَنَتو حوران، قسمہ آسایش کوریتاؤ
کو تان رحمتو چھاغار یو داڑے مہ خِش کوریتاؤ
ریسان مخلوقوتے دوم کیاغ کی ہویے بہتر ہاسے کیاغ
یادا؟ ارزوان ارو تو حشر نشر ہاسے کیاغ
اللہ
تو مہ حکمان ہمیشہ کوریک منافی مشکیتاؤ
دنیامہ بندگنان اوشوپیک کافی مشکیتاؤ
تو گمراہیو بچین وخت دی اضافی مشکیتاؤ
کورا آدمو غونہ مسار معافی مشکیتاؤ
خواہش آدمو الگ،تہ خواہش مگر ہاسے کیاغ
رے اسوم کا دی نکی مہ غون باخبر ہاسے کیاغ
ابلیس
یہ کائیناتو نظام بو پوشٹو تدبیر کی بیرائے
مخلوق اوا دی تہ تان آدم تہ سفیر کی بیرائے
تو مہ پیدا کو ارو؟ گمراہی تقدیر کی بیرائے
تقدیر دی تہ ہوستہ شیر، ہیس دی تہ تحریر، کی بیرائے
پڑیک تہ پیدا کوریرو ہے خیر اوچے شَر ہاسے کیاغ
یادا؟ ارزوان ارو تو حشر نشر ہاسے کیاغ
اللہ
دُنیو نظامہ کی ہاؤ بوبو لو پوتھور دی شینی
تو دی مخلوق کیہ مگم تہ موژا غرور دی شینی
تقدیر دی شیر کیہ مگم عقل اوچے شعور دی شینی
تَت اختیار دی پھیتام، نَفُس دی، لو خور دی شینی
تاتین دیتی اسیتام علم اوچے ہنر ہاسے کیاغ
رے اسوم کا دی نکی مہ غون باخبر ہاسے کیاغ
ابلیس
اوا اَنگارار ساؤز اَنگار مہ پالیرا نوا؟
ای گنہگار مہ نسہ گیاو متے کیہ ریرا نوا؟
بندہ تان پڑیک گناہان مہ سورو غیریرا نوا؟
دیتی داغی انسانو محشرہ مونیرا نوا؟
دی لہ، تھ رے اسیتاو شوم تہ مُقَدَر ہاسے کیاغ
یادا؟ ارزوان ارو تو حشر نشر ہاسے کیاغ
اللہ
لوشٹینگ چھوتیین کی پراؤ انسانو چھامیر خامَخَہ
تو کی اَنگارو بغاؤ اَنگار تہ پالیر خامَخَہ
تان ہر گناہو لوڑی بندہ تہ نامیر خامَخَہ
تو بو جنونہ اسوس تاتین ہَش ساریر خامَخَہ
رے اسوم تہ عقلاری ہیت بو بالاتَر ہاسے کیاغ
رے اسوم کا دی نکی مہ غون باخبر ہاسے کیاغ
ابلیس
اَژی آدمو ساری سَف تہ بندگان دی ہونی
نیسی انسانیتار بو انبوح حیوان دی ہونی
" اَلَستُ بِرَبِّکُم " ریکو یک زبان دی ہونی
پھاتی تان قولہ بو ڈانگ پھاتی نافرمان دی ہونی
"قَالُو بَلٰی" رے وا دی شوم رہا سفر ہاسے کیاغ
یادا؟ ارزوان ارو تو حشر نشر ہاسے کیاغ
اللہ
انسان پیدا کی بویان اسلامو فطرتہ بویان
مہ اطاعتو بچین شوقِ عبادتہ بویان
ذوقِ نظر مبتلاء فریبو رنگتہ بویان
ماحول فطرتو چھینیر ہیس تہ شرارتہ بویان
راسخؔ شِکوَہ کوریتایے شعرہ سراسر ہاسے کیاغ
رے اسوم کا دی نکی مہ غون باخبر ہاسے کیاغ