Нұрдос - департаменттің экология бойынша тұрақты комиссия мүшесі, сонымен бірге, басылым бетінде эколгогия тақырыбын қаламына арқау еткен қаламы қарымды журналист. «Орталық Қазақстан» газетінде экология тақырыбындағы «Сарыарқа» бетін ұйымдастырып, өзекті мәселелерді көтеріп келеді.
Нұрдос Кәрім
Балалық туралы баллада
Қайран, мектеп, бүгінде жырақта ма,
Естеліктер есімде, бірақ, дара.
Бір апта ерте кетіп, демалысқа,
Кешігіп келуші едім бір аптаға.
Тапсырманы көп еді тыс жазғаным,
Кешігумен өтті ғой қыс - жаздарым.
Қойшының баласының сол әдетін,
Қойдыра алмай кетті рас ұстаздарым.
Ауылдағы әр күнім сәтті маған,
Сондықтан да жасадым нақты қадам.
Мінгесіп мен қайтуға қамданушы ем,
Ауылдан келе қалса аттылы адам.
Көңілдерден кей кезде көшкен арай,
Сақталмасын ол күндер есте қалай.
Ауылға көлік іздеп жүрген күні,
Көршіміз келе қалды кешке қарай.
Мінгені кертөбел ат ел білетін,
Желмаядай жүйкітіп
желдіретін.
Тек жалын тартқызатын иесіне,
Шапқанда ұшқан құспен тең жүретін.
Ішінде дара тұрған кіл жүйріктің,
Білсем де асаулығын қылқұйрықтың.
Иесіне өтіндім ала кет деп,
Ішім сезді боларын бір бұйрықтың.
Мінгесіп кету ойым аттылыға,
Мақсатым сол - ақ еді нақтылыда.
Кертөбел жаясына жайғаспасам,
Таусылардай көрінді шаттығым да.
Ертесін жарты сағат аясында,
Жайғастым кертөбелдің жаясына.
Арғымақ қанша мінез танытқанмен,
Тапжылмадым сертіңнен таясың ба.
Кертөбел туласа да жығылмадым,
Асауға төтеп берді шымыр жаным.
Мен сонда арман менен мақсат үшін,
Өмірде күресуді ұғынғанмын.
Мен солай тақымымды талдырғанмын,
Мен солай ауылға ат шалдырғанмын.
Қалай ғана есімнен шыға қойсын,
Ұмытылмас естелік қалдырған күн.
Өткен шағым көрінер ертегі елге,
Мендік ғұмыр осындай көркем өрме.
Әлі күнге мінгесіп жүріп келем,
Өмір деген шу асау кертөбелге.
Н.К