الجديد مهوله الفضلي
كلماتي✒️
اداء (جفران بن هضبان)🎶
ياهل البكار اللي عليها دعايات
ميعادكم في ساحتن تجمع الزين
في ساعتن ماهيب حكي وفراغات
فيها يضيع الحكي والناتج ايبين
وامهوّله في ساحت الشوط لاجات
تقلب على روس الخصوم الموازين
تلاد لو تدحم هل المشتراوات
قدّامها ف الشوط ماهم بضاوين
من شافها يذكر بديع السماوات
وعلى النبي تكثر صلات المصلين
جمهورها تهتز مِنْه المنصات
من كل فج وصوب ياتون عانيين
من زحمته سكّر جميع المسارات
اللي من ايسار المنصات ويمين
حتى هل الأعمال واهل الدوامات
لعيونها على الحضور امتواصين
في وجهها الناموس قبل الإذاعات
جمهورها قبل النتايج امهنيين
ترفع شعار ابلادها في لمارات
ونجازها ايمثّل بلاد الحرامين
حدث حدث تناقلته القناوات
بعد ما وصل امشاهداته ملايين
وصلت ملايين المشاهد ترندات
في كل موقع معجَبين ومحبين
تكثر على اهلها ضغط لتصالات
اهل البيارق والنخب والميادين
لو دبّلو ف اسوامها عشر مرات
جمهورها امعيي واهلها امعيين
يستاهلون إنجازها والإشادات
اللي على دحم المحافل امضرين
اهل الجهام اهل الجهام المقيمات
ماهم ب من تالي الزمان امتبدوين
شمخ نباهم في جميع المجالات
ومجادهم تدونتها الدواوين
الهم من الماضي وفالحاضر اصيات
نسمع ذكر لفّضول يذكر من اسنين
الفضلي اشهر من جبال السراوات
و ارسا من اللي ف المواقيف راسين
اصفوفهم عند الامور المهمات
على التصدّر ف الصفوف امعروفين
في كل دوله فايزين ابّطولات
ابطالهم في كل ميدان راهين
عاداتهم والكل رجّال عادات
واكثر ما يظهر ف الرجال المسمّين
والى تهقوو ف ال رشدان هقوات
ماهم على الهقوات فيهم بغادين
رشدان ذكره باقيٍ حي لو مات
وعلى نهج رشدان نهج السلاطين
فعياله اعياله مزاياً عديدات
حتى حسن لخلاق واللطف والدين
ولا حصل بين النشاما اختلافات
شفهم معا والراي واحد لذا الحين
الله خلقهم ف المراجل قداوات
الاربعه في كل درب امتصافين
والهم معا روس القبايل علاقات
وفي كل ما يعني المطاليق وافين
فيهم على فعل المعاريف هومات
على سبيل اهل الجمايل امعانين
ودك يسجل عندهم ف البطاقات
افلان ابن رشدان بعده ونعمين