Президенти Тоҷикистон Эмомалӣ Раҳмон рӯзи 9 январи соли 2024 фармони №671 дар бораи боло бурдани маошу нафақаҳоро имзо кард. Аз 30 то 40 фоиз боло бурдани маошу нафақаҳо дар соли 2024 аз ҷумл ваъдаҳои асосии Эмомалӣ Раҳмон дар паёми солонааш дар санаи 28 декабр буд. Бар асоси фармони президент, маоши вазифавии хизматчиёни ҳарбӣ, ҳайати шахсии қаторӣ ва роҳбарикунандаи мақомоти корҳои дохилӣ, мақомоти прокуратура ва дигар мақомоти ҳифзи ҳуқуқ алакай аз 1 январи соли 2024 ба андозаи 40 фоиз зиёд карда шуд.
Маоши вазифавии кормандони мақомоти ҳокимият ва идоракунии давлатӣ, муассисаҳои соҳаҳои маориф, илм, фарҳанг, варзиш, тандурустӣ, ҳифзи иҷтимоӣ ва ташкилотҳои дигари буҷетӣ аз 1 июли соли 2024 ба андозаи 40 фоиз зиёд мегардад. Стипендияҳои кунунии донишҷӯёни муассисаҳои таҳсилоти миёна ва олии касбӣ, аз ҷумла стипендияҳои президентӣ аз 1 июли соли 2024 ба андозаи 40 фоиз боло бурда мешаванд. Нафақаҳои суғуртавӣ, меҳнатӣ ва иҷтимоӣ, инчунин иловапулӣ ба онҳо аз 1 июли соли 2024 дар ҳаҷми 30 фоиз аз андозаи муқарраршудаашон зиёд карда мешаванд.
Сокинон аз тасмими боло бурдани маошу нафақаҳо изҳори хушҳолӣ мекунанд, вале дар айни замон аз он шикоят доранд, ки ҳанӯз маошу нафақаҳо боло норафта, мақомот нархи барқу об ва хидматҳои коммуналиро боло бурданд, ки ин самараи афзоиши маошҳоро тақрибан ҳеҷ мекунад.