әл-Фатиха: 1
(1) Рахман әрі аса Рақымды Алланың атымен (бастаймын).
(2) Бар мадақ, шүкіршілік атаулы күллі әлемнің Раббысы - бір Аллаға арналады.
(3) Ол - Рахман әрі аса рақымды,
(4) Дін (жауапқа тарту, үкім шығару һәм қарымта) күнінің иесі.
(5) (Уа, Жаратқан!) Бір Өзіңе ғана құлшылық етіп, бір Өзіңнен ғана медет тілейміз.
(6) Бізді (разылығыңа жеткізетін) тура жолға сала көр!
(7) Қаһарыңа ұшырағандардың және адасқандардың жолына емес, Өзің нығметке бөлеген (ізгі құлдарыңның) жолына (сала көр)!
Мәриям: 19
(1) Кәф, Һә, Иә, Айин, Саад
(2) Бұл Раббыңның пендесі Зәкәрияға тигізген шарапатының баяны.
(3) Бірде ол Раббысына сыбырлап қана іштей мінәжат етті.
(4) Сонда ол былай деген еді: «Уа, Раббым! Сүйегім саудырап, басым бейне бір ақ жалынға шарпылғандай шашым ағарды. Уа, Раббым! Өзіңе қай кезде болмасын дұға еткенімде әсте мақұрым қалған емеспін».
(5) «Расында, мен өзіме мұрагер болатын жақындарыма қарап алаңдаудамын. Әйелім болса, бедеу. Маған Өзіңнің шексіз шарапатыңмен бір мұрагер (перзент) нәсіп ете көр!»
(6) «Ол менің де, Яқуб әулетінің де мұрагері болсын. Уа, Раббым, оны Өзіңнің разылығыңа бөлегейсің!»
(7) (Сонда Алла тағала періштелері арқылы): «Уа, Зәкәрия! Сені есімі Яхия болатын ұлмен сүйіншілейміз (қуантамыз). Біз бұған дейін ешкімді оған аттас қылған емеспіз (яғни, оның атын ешкімге қойған емеспіз)», - деп уахи етті.
(8) Зәкәрия (таңғалып): «Уа, Раббым! Әйелім болса бедеу, ал өзім әбден қаусап, қартайған шағымда қалайша балалы болмақпын?» - деп сұрады.
(9) Сонда уахи әкелген періште оған: «Солай болмақ, (бұл Алланың пешенеңе жазғаны)! Раббың: Мен үшін ол оп-оңай. Шынын айтқанда, сені де кезінде жоқтан жараттым ғой дейді», - деді.
(10) Зәкәрия: «Уа, Раббым! Ендеше, маған (әйелімнің бала көтергенін көрсететін) бір белгі бере көр!» - деп өтінді. Алла оған: «Саған берілетін белгі - сап-сау болғаныңа қарамастан үш тәулік бойы ешкімге де тіл қата алмай қаласың», - деді.
(11) Содан ол ғибадатханадағы михрабтан (құлшылық ететін бөлмесінен) қауымының алдына шығып, оларға (тіл қата алмаса да) Раббыларыңды ертелі-кеш еске алып ұлықтаңдар! - деп ишарат қылды.