Мұқағали Мақатаев, шын есімі Мұхаммедқали - қазақтың лирик ақыны, поэзия әлемінің асқар шыңы, өз заманында лайық бағасын ала алмаса да өзінен кейінгілер үшін мәртебесі биік ақын.
Мұқағалидың өлеңдері шабыттың, қиын күйзеліс пен қуаныштан, шынайы сағыныштан туған. Ақын ұлы сезімге бас иіп, өз өлеңдерінде махаббат тақырыбын кеңінен суреттеген. Мұқағали әр өлеңі өзінің мағынасымен, шынайылығымен, тазалығымен оқырманын өзіне баурап алады және ой салады.
Мұқағали мұрасы, маржан поэзиясы - мәңгілік, болашақ ұрпақтың еншісі, қадірлейтін мұрасы. Ақынның сөзі өлмесе, өзі де өлмегені. Мұқағали - жалпыхалықтық, ұлттық тұлға. Әрбір өлеңін оқығанда, оның қазақ екенін жазбай танисың, ұлт ақыны екенін айқын аңғарасың.