Облыс орталығындағы № 45 орта бейіндік мектебінде «Ұлттық құндылықтар-тәрбиенің түп қазығы» атты ауқымды шара өтті. Мәдени жиынға мектеп директорларының тәрбие жұмысы жөніндегі орынбасарлары, жас сынып жетекшілер, педагог-ұйымдастырушылар, аға-тәлімгерлер қатысты.
Жиынға келген халықтың қарасы қалың. Мұндағы ұстаздар мен ата-аналар тағылымы мол шарадан рухани азық алып қайтуға ниетті. Шеберлік сағаты 9 түрлі бөлімнен тұрады. Сахна шымылдығы ұлттық құндылықты суреттейтін көрініспен түріліп, әуелеген ән шырқалды. Ауыл-аймақтан келген ұстаздар мен тәрбие ісінің меңгерушілері жеребе бойынша бірнеше топқа бөлініп, шеберлік сабақтарына қатысты.
Бұл жиын бұрынғыдан өзгерек. Ұйымдастырушылардың айтуынша, мәдени отырыста ұлттық құндылықтарды ұрпақ санасына сіңіріп қана қоймай, қазақ халқының атадан балаға мұра етіп қалдырған салт-дәстүрін жас ұрпаққа дәріптеу. Мұнда ауызекі ашық сабақтан бөлек, ұлттық ойындардан да жарыстар өтті.
Қалалық «Абай» оқуларының , қазақ тілі мен әдебиеті пәндік олимпиадаларының жүлделі орын иегері Ажар Серікқызы білім мен тәрбие жолында мектеп ордасының алтын діңгек болғанын айтады.
Бұл шараның тәлімгер тарап пен өскелең ұрпаққа берген тағылымы жетерлік.Тәрбие мен білім егіз ұғым. Ал, ұлттық құндылық соның негізгі бастауы. Осы бағытқа кең жол ашып, шәкірт тәрбилеу жолында жан-жақты тәсілдерді ескеретін ұстаздар қауымы баршаға үлгі.