Шымкентте «Орда» университетін оқып бітірген 200-ден астам түлек 2 айдан бері дипломын ала алмай табанынан тозып жүр. Бастауыш сыныпқа білім беретін педагог пен логопед мамандығын алғанын растайтын құжаттары болмаған соң ордалықтар жұмысқа да орналаса алмай отыр. Айтуларынша, оқу орны осыдан үш ай бұрын лицензиясынан айырылған. Кесірінен түлектерге тиесілі диплом да берілмей келеді. Екі ортада құжатсыз қалған жас мамандар 4 жыл бойғы білім мен оқу ақысы зая кете ма деп қорқады.
Айтуларынша, оқу орны осыдан үш ай бұрын лицензиясынан айырылған. Кесірінен түлектерге тиесілі диплом да берілмей келеді. Екі ортада құжатсыз қалған жас мамандар 4 жыл бойғы білім мен оқу ақысы зая кете ма деп қорқады.
4 жыл бойы көз майын тауысып, бір миллион теңгеге жуық ақы төлеп оқыған кешегі студент бүгінгі түлектер университет басшылығына ренжулі. Олар талаптанып ізденген шәкірттеріне дипломын бермей 2 ай сандалтқанына ашулы. Айтуларынша, көбі жұмыс тапқанымен, бір жапырақ қағаздың жоқтығынан сан соғып қала берген.
ЗАРИНА САПАР, түлек:
- Екі ай болды диплом ала алмай жатырмыз. Екі ай үйде отырмыз жұмыссыз. Не жұмысқа тұра алмаймыз, не магистратураға оқуға тапсыра алмай жатырмыз. 4 жыл бойы адал еңбегімізбен оқыдық. Біз оқуға қабылданбас бұрын айтқан болатын, біз 5 жылға аккредитациядан өткенбіз. Лицензиямыздан ешкім айыра алмайды деп айтқан.
АРУНА ТҰРҒЫН, түлек:
- Мен бір жыл магистратурадан да қалдым. И келісіп, сөйлесіп қойған жұмысымнан да қалдым. Себебі мен әлі диплом алмағанмын, менен бұрын диплом алған қыз орныма кіріп кетті.
Дипломның жырын-жырлап шалғайдан келген студенттер де жетерлік. Бергісі облыстың аудандарынан болса, арғысы қызылордалық түлектер. Сандалған ұл-қызын көріп, енді ата-аналар да оқу орнының табалдырығын тоздырып жүр.
ГҮЛНӘР БАЛҚЫБЕКОВА, ата-ана:
- Келеді, кетеді, келеді, кетеді. Қызым Қазығұрт ауданына тұрмысқа шыққан. Қайын жұртынан да ұят болды. Диплом алам деп келеді, диплом жоқ. Енді қазақпыз ғой, түсінесіздер ғой. Сосын бүгін өзім келдім.
200-ден астам студентті сандалтқан университет 3 ай бұрын лицензиясынан айырылып қалыпты. Бұны оқу орнының басшылығы да мойындады. Министрлік тарабынан келген тексеру қорытындысымен 3 кемшілік анықталған. Енді соның кесірінен құжат беруде қиындық туындап отыр екен. Бірақ қазір осындағы мемлекеттік және лицензиясы бар жеке меншік оқу орындарымен келіссөз жүргізіліп, диплом беру жолдары қарастырылып жатыр деді.
ИРИНА ЕФИМОВА, «Орда» университеті президентінің кеңесшісі:
- Бізде кесте түзілген. Сол бойынша кезең-кезеңімен дипломды береді. Ертең бастауыш оқыту әдістемесі мен педагогикасы мамандығын меңгергендер диплом алады. Ал дефектологтар мен бейнелеу өнерін оқыған студенттер алдағы 10 күнде оқуды бітіргені туралы құжатқа қол жеткізеді.
Оқу орны өкілдерінің бұл сөзіне түлектер мен ата-аналар сене қоймады. Бірақ күтуге келісті. Егер уәде еткен уақытта құжаттары қолдарына тимесе, шағымымызды министрдің алдына барып айтамыз деп отыр.
Мақсат Жақсыбайұлы
Бізді әлеуметтік желіде оқыңыздар:
KZread - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Орда #дипломсыз_студенттер #Шымкент #БілімБеру