"Юлдузлар юрган йўл" кўрсатуви
"Ёшлар" телеканали
Ўзбекистонда хизмат кўрсатган артист Козим Қаюмов 1955 йил 14 октабрда Тошкент шахрида таваллуд топади. Отаси- Обидхўжа қўли гул уста, дурадгор бўлган. У инсон қанчадан-қанча биноларни бунёд этиб, одамлар дуосини олган қурувчилардан эди. Онаси- Насиба ая эса етти фарзандни тарбиялаб, уларни меҳнатга, ўқишга, ҳалолликка ўргатган меҳрибон уй бекаси бўлган.кенжатой фарзанд Козимжон эса отасининг олдида ўтириб, у куйлаган қўшиқларга завқ билан қулоқ тутарди. Унинг саньатга бўлган ошнолиги, қизиқиши балки шундандир. Козим Қаюмов ўрта мактабни аьло баҳоларга тамомлаб, Тошкент ҳалқ хўжалиги институтида таҳсил олди. Саньатга, мусиқа бўлган чексиз иштиёқ уни Тошкент давлат саньат институти томон етаклади. У институтда режиссёрлик ва актёрлик маҳорати бўйича ўқиб, ўрганиб, саньатда ўз йўлини топишга интилди. Эл эьтиборидаги устозлардан таьлим олди. Айниқса, Ўзбекистон ҳалқ артисти Ботир Зокиров ўгитларига доим амал қилди. Куйлаган қўшиқларини севиб тинглаб, қўшиқ айтиш маҳоратини ўрганди. Саньат оламига аста-секин кириб боргани сари чет эл хонандалари ижро этган ва қардош ҳалқлар репертуаридан ўрин олган эстрада қўшиқларига қизиқиши ортиб борди. У ўзи таҳсил олган институтни имтиёзли тамомлаб, иш фаолиятини Ўзбекитон Миллий телерадиокомпанияси қошидаги эстрада симфоник оркестридан бошлади. Бу ерда у 30 йилдан ортиқ меҳнат қилди. Козим Қаюмов 50дан ортиқ чет эл сафарларида, қолаверса, республикамизнинг барча вилоят ва туманларида бўлиб, ўз ўз саньати билан мусиқа шайдолари меҳрини қозонди. 1995 йилда “Ўзбекистонда хизмат кўрсатган артист” унвони билан тақдирланди. Козимжон 1979, 1980-1981 йилларда ҳалқаро эстрада танловларида мутлоқ ғолибликни қўлга киритди. Козим Қаюмов айни пайтда Ўзбекистон давлат консерваториясида ва мусиқа мактабида ёш талабаларга саньат сирларини ўргатиб, кўплаб шогирдларга “Вокал” қўшиқчилиги йўналишидан сабоқ бераяпти.